Muzeu i viteve të 80-ta, i vendosur në kryeqytetin e Bosnjë dhe Hercegovinës (BeH), Sarajevë, i çon vizitorët në një udhëtim nostalgjik me arkiva, objekte dhe pajisje të asaj periudhe.

I vendosur pranë Urës Latine "Muzeu i Sarajevës i viteve 80" ekspozon televizorë, radio, kamera, makina shkrimi, gramafonë dhe lodra të përdorura në vitet 1980.

Muzeu, i cili tërheq turistë vendas dhe të huaj, shfaq gjithashtu sende nga Lojërat Olimpike Dimërore të vitit 1984 të mbajtura në Sarajevë.

Muzeu u prezanton vizitorëve të rinj në mënyrë të veçantë epokën para internetit dhe telefonave inteligjentë.

I vendosur në një apartament me atmosferë të viteve 1980, muzeu përmban një dhomë fëmijësh, një dhomë ndenjeje dhe një dhomë gjumi të mobiluar me objekte të periudhës. Lodrat në dhomën e fëmijëve janë ndër sendet më të njohura për vizitorët.

Kuratori i Muzeut të Sarajevës i viteve të 80-ta, Azem Heljiq tha për Anadolu se ata kanë për qëllim të dokumentojnë një epokë të pasur kulturore. Ai shtoi se ata kanë reflektuar trashëgiminë e epokës jugosllave në muze.

"Në muze, ne kemi reflektuar gjithashtu vlerat e Sarajevës, nga muzika dhe kinemaja te jeta dhe kultura urbane. Këtu, po u prezantojmë të rinjve një periudhë që nuk mund ta mësojnë nga librat. Të moshuarit preken, madje preken deri në lot, nga objektet që u kujtojnë rininë e tyre", thotë Heljiq.

Ai thekson se vazhdojnë ta zhvillojnë muzeun me donacione nga qytetarët dhe se ka interes për filxhanët dhe pjatat e kafesë të prodhuara për Lojërat Olimpike Dimërore të Sarajevës në vitin 1984.

Kuratori i muzeut tregon se ata duan të prezantojnë në muze tema të reja, të tilla si një mjedis shkollor dhe një berberhane, që përshkruan vitet 1980. Heljiq tha se vitet 1990 do të paraqiten përmes syve të paqeruajtësve të huaj, gazetarëve dhe diplomatëve që shërbejnë në Bosnjë dhe Hercegovinë.