Zelenskyy: Garancitë e sigurisë nga ShBA-ja për Ukrainën janë 100 për qind gati

Një dokument amerikan për garancitë e sigurisë për Ukrainën është plotësisht i përgatitur dhe Kievi po pret vetëm kohën dhe vendin për nënshkrimin e tij, deklaroi presidenti ukrainas Volodymyr Zelenskyy, duke vlerësuar se bisedimet e fundjavës me Rusinë në Abu Dabi sollën njëfarë përparimi.

“Të premten dhe të shtunën, negociatorët ukrainas dhe rusë zhvilluan takimin e tyre të parë trepalësh, me ndërmjetësimin e Shteteve të Bashkuara, në Abu Dabi, për të diskutuar kornizën e Uashingtonit”, por pa arritur një marrëveshje përfundimtare.

“Për ne, garancitë e sigurisë janë para së gjithash garanci sigurie nga Shtetet e Bashkuara. Dokumenti është 100 për qind gati dhe ne po presim që partnerët tanë të konfirmojnë datën dhe vendin e nënshkrimit”, tha Zelenskyy në një konferencë për shtyp të dielën, gjatë një vizite në Vilnius, kryeqytetin e Lituanisë.

Ai shtoi se dokumenti do t’i dërgohet për ratifikim Kongresit amerikan dhe Parlamentit të Ukrainës.

Megjithëse nga bisedimet në Abu Dabi nuk doli një marrëveshje konkrete për përfundimin e luftës gati katërvjeçare, Moska dhe Kievi kanë shprehur gatishmëri për dialog të mëtejshëm. Një zyrtar amerikan u tha gazetarëve se diskutime të tjera pritet të mbahen të dielën e ardhshme, sërish në Abu Dabi.

“Në Abu Dabi po diskutohen plani amerikan me 20 pika dhe çështjet problematike. Kishte shumë çështje problematike, por tani janë më pak,” tha Zelenskyy.

Sipas tij, Moska po përpiqet të bëjë gjithçka për ta detyruar Ukrainën të heqë dorë nga rajonet lindore që Rusia nuk ka arritur t’i pushtojë.

Megjithatë, ai theksoi se Kievi nuk ka lëvizur nga qëndrimi i tij se integriteti territorial i Ukrainës duhet të respektohet.

“Këto janë dy pozicione thelbësisht të ndryshme – ai i Ukrainës dhe ai i Rusisë. Amerikanët po përpiqen të gjejnë një kompromis,” tha Zelenskyy, duke shtuar se të gjitha palët duhet të jenë të gatshme për kompromis, përfshirë edhe Shtetet e Bashkuara.