Bilbordet e fushatës që mbështesin një politikan të opozitës izraelite kanë shkaktuar polemika në Administratën e Qipros Greke, duke acaruar banorët vendas për shkak të pranisë në rritje të Izraelit dhe duke nxitur thirrje për rregulla më të rrepta ndaj fushatave politike të huaja.
Reklamat e mëdha buzë rrugës promovojnë Gadi Eisenkot-in, ish-shefin e ushtrisë izraelite që tani drejton partinë Yashar të Izraelit, pranë aeroportit të Larnakës, në prag të zgjedhjeve parlamentare izraelite të planifikuara për 27 tetor.
Të vendosura përgjatë rrugëve që përdoren nga udhëtarët për në dhe nga aeroporti, fushata synon qytetarët izraelitë që vizitojnë pjesën greke-qipriote të ishullit gjatë sezonit të pushimeve.
Sipas raportimeve, rreth 590.000 izraelitë vizituan Administratën Greke-Qipriote në vitin 2025, duke e bërë Izraelin burimin e dytë më të madh të turizmit pas Mbretërisë së Bashkuar, me rreth 13 për qind të të gjitha ardhjeve turistike.
Një tabelë në hebraisht i uron mirëseardhjen turistëve me mesazhin "Izraelitë, argëtohuni! E meritoni", ndërsa një tjetër u drejtohet udhëtarëve me mesazhin "Zbritët? U argëtuat? Tani kthehuni dhe fitoni!"
Sipas Cyprus Mail, fushata e Eisenkotit konfirmoi se bilbordet janë pjesë e përpjekjes së saj zyrtare për vëmendje jashtë vendit, të projektuar për të inkurajuar izraelitët në pushime jashtë shtetit që të marrin pjesë në zgjedhje.
Fushata ka tërhequr kritika nga politikanë që argumentojnë se reklamimi elektoral nga partitë politike të huaja nuk duhet të lejohet në Administratën e Qipros Greke.
Duke kritikuar bilbordet, deputeti i pavarur i Parlamentit Evropian, Fidias Panayiotou, tha: "Kjo foto nuk u bë në Izrael, por në vendin tim". Ai shtoi se kjo herë bëhet fjalë për propagandë politike, por po bëhet gjithnjë e më e zakonshme të shihen edhe bilborde që reklamojnë pasuri të paluajtshme në hebraishte në të gjithë ishullin, duke vlerësuar se kjo thjesht nuk është në rregull.
Në një video të veçantë, Panayiotou dënoi reklamat dhe paralajmëroi gjithashtu për shqetësimet lidhur me blerjen e tokave nga izraelitët.
"Kjo nuk është në rregull. Duhet të jemi të kujdesshëm në Qipro që asnjë vend i tretë të mos vijë dhe ngadalë-ngadalë të përvetësojë tokë të rëndësishme", tha ai, ndërsa ndau lajme rreth blerjes së tokave nga izraelitët, me një titull që paralajmëronte për një "formë kolonizimi".
