Kryeministri në detyrë i Republikës së Kosovës, Albin Kurti, ka pritur në takim Ambasadorin e Republikës së Türkiyes në Kosovë, Sabri Tunç Angili, me të cilin ka diskutuar për thellimin e mëtejmë të partneritetit bilateral.
Zyra e Kryeministrit njofton se kryeministri Kurti ka vlerësuar bashkëpunimin e deritanishëm, veçanërisht në fushën e sigurisë dhe mbrojtjes, si dhe rolin e rëndësishëm të Türkiyes në misionin e NATO-s në Kosovë, përfshirë komandën e KFOR-it.
Kurti ka theksuar se ky bashkëpunim në fushën e mbrojtjes do të vazhdojë edhe në të ardhmen dhe ka falënderuar ambasadorin Angili dhe Republikën e Türkiyes për gatishmërinë dhe partneritetin.
Në takim është trajtuar edhe raporti në fushën e ekonomisë dhe tregtisë ndërmjet dy shteteve ku në këtë drejtim është diskutuar për mundësinë e organizimit të një forumi të biznesit, i cili pas forumit të parë që u mbajt në Istanbul në qershor të vitit 2024, këtë vit do të mund të organizohet në Prishtinë.
Ambasadori Angili e ka uruar kryeministrin për fitoren në zgjedhjet e 28 dhjetorit 2025.
Kryeministri Kurti e ka falënderuar ambasadorin për takimin dhe komunikimin e vazhdueshëm dhe për ftesën e Republikës së Türkiyes për pjesëmarrje në Forumin Diplomatik në Antalya.
