Gjykatësi amerikan urdhëron rikthimin e regjistrit SEVIS të studentes turke Rümeysa Öztürk

Një gjykatës federal i ShBA-së ka urdhëruar administratën Trump të rikthejë regjistrin SEVIS në bazën e të dhënave të imigracionit për studenten turke të doktoraturës, Rümeysa Öztürk, duke konstatuar se autoritetet me shumë gjasë vepruan në mënyrë të paligjshme kur i ndërprenë statusin.

Kryegjyqtarja Denise Casper e Gjykatës së Qarkut të ShBA-së për Distriktin e Massachusetts lëshoi të hënën një urdhër të përkohshëm, duke arritur në përfundimin se Öztürk ka “të ngjarë të ketë sukses” në pretendimin e saj se veprimi i Shërbimit të Imigracionit dhe Doganave të ShBA-së (ICE) ishte “i paarsyeshëm dhe arbitrar”.

Ajo urdhëroi zyrtarët të rivendosin regjistrin SEVIS të Öztürkut me efekt retroaktiv nga data 25 mars, dita kur agjentë të ICE-së me maska e ndaluan në Somerville, Massachusetts.

SEVIS është një bazë të dhënash federale e administruar nga ICE-ja dhe përdoret për të ndjekur studentët e huaj.

Ndërprerja e regjistrit të një studenti i ndalon atij punën dhe rrezikon qëndrimin e tij ligjor në vend.

Në një deklaratë të lëshuar përmes Unionit Amerikan për Liritë Civile (ACLU), Ozturk u shpreh mirënjohëse për vendimin.

“Shpresoj sinqerisht që askush tjetër të mos përjetojë padrejtësitë që kam kaluar unë”, tha ajo.

“Shpresoj që një ditë të krijojmë një botë ku arsimi përdoret për të mësuar, për t’u lidhur, për t’u angazhuar qytetarisht dhe për të ndihmuar të tjerët, e jo për të kriminalizuar dhe ndëshkuar ata që kanë mendime të ndryshme nga tonat. Ndërsa jam mirënjohëse për vendimin e gjykatës, ndiej ende një pikëllim të madh për të gjitha të drejtat arsimore që më janë mohuar në mënyrë arbitrare si studiuese dhe si grua në vitin tim të fundit të studimeve të doktoraturës”, deklaroi ajo.

Departamenti i Sigurisë Kombëtare nuk ka komentuar ende.

Öztürk, një studente Fulbright dhe doktorante në Universitetin Tufts, u arrestua nga agjentë të ICE-it me rroba civile të cilët e rrethuan jashtë banesës së saj më 25 mars.

Viza e saj studentore u revokua më pas nga Departamenti i Shtetit dhe ajo u transferua në një qendër paraburgimi të ICE-it në Luiziana, ku kaloi gjashtë javë, para se një gjykatës federal në Vermont të urdhëronte lirimin e saj më 9 maj, duke përmendur astmën e saj dhe mungesën e arsyetimit për vazhdimin e paraburgimit.

Arrestimi i saj pasoi një fushatë online të drejtuar ndaj saj nga faqja pro-Izraelit Canary Mission, e cila e kritikoi për bashkëshkrimin e një artikulli më 2 mars 2024 në The Tufts Daily, ku dënohej reagimi i universitetit ndaj thirrjeve për të ndërprerë investimet në kompani të lidhura me Izraelin dhe kërkohej njohja e një “gjenocidi palestinez.”

Administrata Trump ka pretenduar se Ozturk është angazhuar në aktivitete që mbështesin Hamasin, por nuk ka paraqitur prova që e mbështesin këtë pretendim.

Ajo ishte ndër disa studentë ndërkombëtarë të përfshirë në goditjen e gjerë të administratës kundër aktivistëve pro-Palestinës në kampuse.