Ministria e Mbrojtjes e Mbretërisë së Bashkuar, të enjten, hodhi poshtë pretendimin e Argjentinës se një anije patrullimi e Marinës Mbretërore ka kryer një "ndërhyrje ushtarake" në ujërat e saj.
Ministria e Jashtme e Argjentinës tha se kishte paraqitur një "notë zyrtare proteste" pranë Ambasadës Britanike, duke pretenduar se anija HMS Medway kishte hyrë në ujërat argjentinase më herët këtë muaj, pa njoftim paraprak.
Ankesa erdhi disa orë pas fitores së Argjentinës ndaj Anglisë në gjysmëfinalen e Kupës së Botës, ndërsa zyrtarë argjentinas e përshkruan lëvizjen e anijes si shkelje të normave ndërkombëtare.
Në përgjigje, Ministria e Mbrojtjes e Mbretërisë së Bashkuar tha se HMS Medway kishte mbështetur operacionet e British Antarctic Survey (BAS) gjatë një misioni rutinë logjistik.
"HMS Medway kreu një vizitë rutinë logjistike në Punta Arenas, nga 5 deri më 8 korrik, duke mbështetur operacionet e British Antarctic Survey, duke dorëzuar furnizime dhe materiale thelbësore për ta mbështetur kërkimin shkencor në Antarktik", tha ministria në një deklaratë të enjten.
"Kalimi nga Ishujt Falkland drejt Kilit dhe mbrapsht u krye përmes rrugës më të drejtpërdrejtë të mundshme, duke marrë parasysh sigurinë operacionale dhe faktorët e motit, për të siguruar dorëzim në kohë”, u tha.
"Kjo aktivitet logjistik i planifikuar pasqyroi angazhimin e vazhdueshëm të Mbretërisë së Bashkuar ndaj kërkimit shkencor polar në nivel botëror dhe mirëmbajtjes së infrastrukturës që mbështet operacionet e BAS-it”.
Ishujt Falkland, territor britanik përtejdetar i njohur në Argjentinë si Islas Malvinas, mbeten në qendër të një mosmarrëveshjeje afatgjatë sovraniteti mes dy vendeve.
Argjentina vazhdon të pretendojë ishujt, ndërsa Mbretëria e Bashkuar thotë se e ardhmja e tyre është çështje që u takon banorëve të ishujve, të cilët në mënyrë të përsëritur kanë shprehur dëshirën për të mbetur territor britanik përtejdetar.
