Presidenti i ShBA-së, Donald Trump, ka deklaruar se pas sulmit ndaj urës më të lartë në Iran, priten edhe goditje të tjera, duke i bërë thirrje Teheranit të arrijë një marrëveshje para se të jetë “shumë vonë”.
“Ura më e madhe në Iran u shemb, për të mos u përdorur më kurrë. Do të ketë shumë më tepër”, shkroi Trump në platformën e tij sociale Truth Social.
“Është koha që Irani të bëjë një marrëveshje para se të jetë shumë vonë dhe të mos mbetet asgjë nga ajo që mund ende të bëhet një vend i madh”, shtoi ai.
Trump i ka bërë vazhdimisht thirrje Iranit për negociata, së fundmi duke pretenduar se udhëheqja e re e Teheranit ka kërkuar armëpushim, gjë që është mohuar nga zyrtarët iranianë.
Më herët, sipas raportimeve të mediave lokale, një sulm ShBA-Izrael goditi një urë kyç në një autostradë kryesore në veri të Iranit.
Sipas agjencisë së lajmeve Fars, disa zona u goditën në rajonin Azimieh pranë qytetit Karaj, përfshirë urën B1, e përshkruar si ura më e lartë në Lindjen e Mesme. Raportohet për disa të lënduar dhe dëmtime të urës, e cila ishte pjesë e një projekti të madh infrastrukture që pritej të inaugurohej së shpejti.
Ky sulm është përshkallëzimi më i fundit në një fushatë që filloi më 28 shkurt, kur ShBA-ja dhe Izraeli nisën një ofensivë ajrore të përbashkët ndaj Iranit, duke vrarë më shumë se 1.340 persona, përfshirë edhe liderin suprem të atëhershëm Ali Khamenei.
Irani është kundërpërgjigjur me sulme me dronë dhe raketa ndaj Izraelit, Jordanisë, Irakut dhe vendeve të Gjirit që strehojnë forca amerikane, duke shkaktuar viktima dhe dëme infrastrukturore, si dhe duke ndërprerë tregjet globale dhe aviacionin.
