Presidenti i Shteteve të Bashkuara të Amerikës, Donald Trump, ka deklaruar se rikuperimi i rezervës së uraniumit të pasuruar të Iranit do të kërkojë një “proces të gjatë dhe të vështirë”.
“Operacioni «Midnight Hammer» ishte një shkatërrim i plotë dhe total i objekteve bërthamore në Iran”, tha Trumpi të hënën, duke iu referuar sulmeve që ai urdhëroi në qershor 2025 ndaj objekteve bërthamore iraniane.
Kreu i Shtëpisë së Bardhë ka këmbëngulur prej kohësh se këto sulme “e shkatërruan plotësisht” programin bërthamor të Iranit dhe së fundmi i është referuar rezervës së uraniumit si “pluhur bërthamor”.
“Prandaj nxjerrja e tij do të jetë një proces i gjatë dhe i vështirë”, shtoi ai.
Këto deklarata vijnë përpara bisedimeve të mundshme të nivelit të lartë në Pakistan.
Trumpi njoftoi të dielën se përfaqësues amerikanë do të udhëtojnë drejt Islamabadit për negociata, edhe pse Teherani ende nuk e ka konfirmuar zyrtarisht pjesëmarrjen dhe ka kërkuar heqjen e bllokadës amerikane në Ngushticën e Hormuzit.
Pakistani priti takimin e parë të drejtpërdrejtë të nivelit të lartë ShBA–Iran në Islamabad më 11-12 prill, kontakti i parë i tillë që nga ndërprerja e marrëdhënieve diplomatike mes dy vendeve në vitin 1979, por bisedimet përfunduan pa ndonjë përparim.
