Ministri i Energjisë dhe Burimeve Natyrore, Alparslan Bayraktar ka deklaruar se derisa bota synon të “rimendojë, ridizajnojë dhe fuqizojë” infrastrukturën e saj elektrike, ekonomitë në zhvillim si Türkiye kanë nevojë për qasje në financim klimatik të përballueshëm dhe afatgjatë.

“Vetëm financimi publik nuk do të jetë i mjaftueshëm”, tha Bayraktar, duke iu drejtuar Samitit të Stambollit për Financimin Klimatik. “Ne duhet të mobilizojmë kapitalin privat, institucionet financiare ndërkombëtare, bankat e zhvillimit dhe investitorët institucionalë afatgjatë”, tha ai.

Ai shtoi se mekanizmat e financimit duhet të zvogëlojnë rrezikun, të ulin koston e kapitalit dhe t’i bëjnë investimet në energjinë e pastër dhe infrastrukturën rezistente ndaj ndryshimeve klimatike tërheqëse nga pikëpamja komerciale.

“Për ekonomitë në zhvillim si Türkiye dhe veçanërisht për këto ekonomi, qasja në financim klimatik të përballueshëm dhe afatgjatë është thelbësore. Tranzicioni energjetik nuk mund të ketë sukses në nivel global nëse financimi mbetet i shtrenjtë ose i paarritshëm pikërisht në vendet ku kërkesa për energji dhe nevojat për investime po rriten më shpejt”, tha Bayraktar.

Ai tha se ngrohja globale dhe ndryshimet klimatike e bëjnë gjithashtu të domosdoshëm rimendimin, ridizajnimin dhe fuqizimin e infrastrukturës elektrike.

“Tashmë po shohim ngjarje ekstreme të motit më të shpeshta dhe më të rënda në mbarë botën, përfshirë edhe Türkiyen. Valët e të nxehtit, përmbytjet, stuhitë, thatësirat dhe zjarret pyjore mund të ndikojnë në prodhimin, transmetimin dhe shpërndarjen e energjisë elektrike”, tha ai.

Prandaj, theksoi ministri turk, financimi klimatik duhet të mbështesë jo vetëm uljen e emetimeve, por edhe qëndrueshmërinë dhe përshtatjen ndaj ndryshimeve klimatike.

“Infrastruktura që ndërtojmë sot duhet të projektohet për kushtet klimatike të dekadave të ardhshme, jo thjesht për ato të së kaluarës. Dhe kjo kërkon burime të jashtëzakonshme financiare”, shtoi ai.

Bayraktar e përshkroi tranzicionin energjetik si “të paprecedentë për nga përmasat”, duke theksuar se ai kërkon më shumë energji të rinovueshme, efikasitet më të madh energjetik, energji bërthamore, sisteme të ruajtjes së energjisë, elektrifikim dhe investime të konsiderueshme në rrjetet e transmetimit dhe shpërndarjes.

“Vetëm në Türkiye, deri në vitin 2035, duhet të investojmë të paktën 80 miliardë dollarë në infrastrukturën tonë elektrike”, theksoi ai.