Ukraina pezullon ministrin e Drejtësisë për shkak të hetimeve për korrupsion

Qeveria e Ukrainës pezulloi ministrin e Drejtësisë, Herman Halushchenko në mes të një hetimi për korrupsion prej 100 milionë dollarësh në sektorin e energjisë së vendit.

"Këtë mëngjes, mbajtëm mbledhje të jashtëzakonshme qeveritare. Morëm vendim për të pezulluar Herman Halushchenkon nga kryerja e detyrave të ministrit të Drejtësisë", shkroi kryeministrja Yulia Svyrydenko në platformën sociale të kompanisë amerikane X.

Svyrydenko shtoi se zëvendësministrja e Drejtësisë për Integrimin Evropian, Liudmyla Sugak, do ta marrë përsipër detyrën e ministres së Drejtësisë. Duke komentuar vendimin, Halushchenko, i cili shërbeu si ministër i Energjisë përpara se të merrte postin e tij aktual në korrik, u pajtua me vendimin, duke thënë se do ta mbrojë veten ligjërisht dhe do ta provojë qëndrimin e tij.

"Duhet të merret një vendim politik dhe vetëm atëherë të merren të gjitha detajet. Unë nuk e mbaj pozicionin e ministrit dhe nuk do ta mbaj. Besoj se pezullimi (i detyrave të mia) për kohëzgjatjen e hetimit është skenar i civilizuar dhe korrekt", tha ai në Facebook.

Ukraina nisi një "operacion në shkallë të gjerë" në sektorin e energjisë të hënën për të zbuluar korrupsionin që përfshinte atë që Byroja Kombëtare Kundër Korrupsionit (NABU) e përshkroi si një "organizatë kriminale të nivelit të lartë" që kërkon të ndikojë në ndërmarrjet strategjike shtetërore, veçanërisht ofruesin kombëtar të energjisë bërthamore "Energoatom".

NABU tha se hetimi i saj përfshinte 15 muaj punë dhe 1.000 orë regjistrime audio dhe se anëtarët e "organizatës kriminale" dyshohet se kërkuan përfitime të paligjshme në masën 10 për qind deri në 15 për qind të vlerës së kontratës shtetërore. Agjencia tha të martën se detektivët e saj arrestuan pesë persona dhe u dërguan shënime dyshimi për shtatë individëve, ndërsa hetimi zbuloi se 100 milionë dollarë kishin kaluar përmes skemës.

Ministria e Drejtësisë konfirmoi se Halushchenko ishte subjekt i hetimit dhe se ai do t'u ofrojë ndihmë të plotë agjencive të zbatimit të ligjit në sigurimin e "hetimit gjithëpërfshirës, ​​objektiv dhe të paanshëm".

"Ministria e Drejtësisë i përmbahet vazhdimisht parimit të tolerancës zero ndaj korrupsionit. Nëse gjenden fajtorë, individët duhet të mbahen përgjegjës në përputhje me procedurën e përcaktuar nga gjykata", tha ajo.

Hetimi vjen vetëm katër muaj pasi presidenti ukrainas, Volodymyr Zelenskyy rivendosi pavarësinë e dy agjencive kryesore anti-korrupsion të vendit. Zelenskyy kishte nënshkruar masa në ligj që i vinin NABU-n dhe Zyrën e Prokurorit të Specializuar Kundër Korrupsionit (SAPO) nën mbikëqyrjen e prokurorit të përgjithshëm. Megjithatë, ai i ktheu masat pas protestave të mëdha, përfshirë ato në Kiev.

Një goditje ndaj korrupsionit është thelbësore nëse Ukraina shpreson të përparojë me aplikimin e saj për t'u bashkuar me Bashkimin Evropian me 27 anëtarë, i cili zyrtarisht hapi negociatat e pranimit me Kievin më 25 qershor 2024.

Kritikët thonë se Kievi ka vuajtur prej kohësh nga korrupsioni i përhapur ndërsa lufta e vazhdueshme me Rusinë thuhet se ka lënë në hije përpjekjet për të zhdukur korrupsionin.