Një dron u zbulua në një plazh pranë farit të Shablës, në verilindje të Bullgarisë, raportoi Agjencia Bullgare e Lajmeve (BTA).

Sipas agjencisë së lajmeve, mjeti ajror pa pilot, me përmasa 3 me 4 metra, u gjet rreth 800 metra larg farit.

Drejtoria Rajonale e Ministrisë së Punëve të Brendshme të Bullgarisë në Dobriç bëri të ditur se policia kishte rrethuar zonën pas zbulimit të dronit.

Sipas BTA-së, personeli ushtarak pritej të mbërrinte në vendngjarje për ta ekzaminuar dronin dhe për ta përcaktuar origjinën dhe gjendjen e tij.

Droni u zbulua nga një person që po shëtiste përgjatë plazhit pranë poligonit ushtarak të Shablës, i cili njoftoi autoritetet.