Presidenti sirian hedh poshtë thirrjet për ndarje dhe federalizëm

Presidenti sirian Ahmad al-Sharaa të enjten hodhi poshtë thirrjet për ndarje ose federalizim në Siri, duke thënë se rajoni bregdetar mbetet një “prioritet” për administratën e tij.

“Ne jemi të përqendruar në mbrojtjen e vendit nga rreziqet e brendshme dhe të jashtme dhe në zhvillimin ekonomik”, tha Sharaa gjatë një takimi në Latakia përmes videokonferencës.

Protesta shpërthyen në disa qytete dhe fshatra në Latakia, Hama, Deir ez-Zor dhe Quneitra të martën, si shenjë mbështetjeje për unitetin dhe integritetin territorial të Sirisë, pas thirrjeve për federalizim në vend.

Protestat erdhën një ditë pasi dy oficerë sigurie dhe disa civilë u plagosën nga të shtënat me armë nga një lagje e populluar nga oficerë të lidhur me regjimin e mëparshëm të Bashar al-Assadit.

Sharaa i përshkroi thirrjet për ndarje apo federalizim si “shprehje të injorancës politike” dhe në shërbim të interesave të ngushta.

Siria ndodhet në “një pikë historike që ndikon në mbarë rajonin”, paralajmëroi ai, duke thënë se Damasku “ka ndërmarrë hapa të mëdhenj dhe ka arritur përparim të rëndësishëm këtë vit.”

Siria “e ka tejkaluar fazën e rrezikut falë politikave të ndjekura nga shteti dhe përfshirjes popullore nga të gjitha pjesët e shoqërisë siriane”, tha ai.

“Gjeografia siriane jeton si një e tërë, dhe është e pamundur që rajoni bregdetar të ketë një autoritet të vetin, të izoluar nga pjesa tjetër”.

Bregdeti sirian “është prioritet sepse ka dalje në rrugët tregtare globale dhe ndërkombëtare,” tha Sharaa.

Ai shtoi se rajoni bregdetar përfaqëson “një hallkë shumë të fortë ekonomike mes Sirisë dhe të gjitha vendeve të rajonit”.

Ai posedon cilësi që “vërtetojnë se uniteti kombëtar brenda Sirisë është i fortë dhe se diversiteti sektar e pasuron shtetin”, u shpreh ai.