Holandë, dhjetë komuna u gjobitën për kryerjen e hulumtimeve mbi komunitetet myslimane
Komunat u gjobitën me 295.000 dollarë për përpunimin e dosjeve që përmbanin informacione të ndjeshme në lidhje me banorët muslimanë pa dijeninë e tyre.
Autoriteti Holandez i Mbrojtjes së të Dhënave (AP) ka gjobitur dhjetë komuna me një total prej 250.000 eurosh për shkelje të ligjeve të privatësisë duke kryer kërkime mbi komunitetet myslimane pa dijeninë e tyre, raportoi të enjten transmetuesi NOS.
Fakti që komunat kishin porositur fshehurazi studime dhe kishin përpunuar dosje që përmbanin informacione të ndjeshme rreth banorëve myslimanë u zbulua në vitin 2021.
Ndërsa komunat nuk ishin të autorizuara të mbanin informacione të tilla, disa nga raportet thuhet se u ndanë edhe me policinë, Koordinatorin Kombëtar për Kundërterrorizmin dhe Sigurinë (NCTV) dhe Ministrinë e Çështjeve Sociale dhe Punësimit.
"Komunat nuk kishin bazë për të pasur atë informacion. Privatësia e personave të prekur është shkelur rëndë. Kjo ka dëmtuar besimin në shumë komuna," tha kryetari i AP-së, Aleid Wolfsen.
Me këshillën e NCTV, disa komuna punësuan agjenci të jashtme për të mbledhur nivele të ndryshme të informacionit të ndjeshëm mbi komunitetet lokale islame, duke përfshirë strukturat e xhamive dhe figurat kryesore, vuri në dukje gjithashtu AP-ja.
Komunat që do të marrin një gjobë përfshijnë Delft, Ede, Eindhoven, Haarlemmermeer, Hilversum, Huizen, Gooise Meren, Tilburg, Veenendaal dhe Zoetermeer.