Deputeti arab në Parlamentin e Izraelit dhe kreu i bllokut parlamentar Lista e Përbashkët Arabe, Ahmad Tibi, tha se blloku po ia shtrin dorën "bllokut të ndryshimit" për ta rrëzuar qeverinë e Benjamin Netanyahut. 

"Blloku i ndryshimit" është një aleancë opozitare që synon ta zëvendësojë qeverinë e kryeministrit Netanyahu. Në të bëjnë pjesë partia Yashar e ish-shefit të ushtrisë Gadi Eisenkot, Yesh Atid e Yair Lapidit, Demokratët e Yair Golanit, Beyachad e Naftali Bennettit dhe Yisrael Beiteinu e Avigdor Liebermanit.

"Pjesëmarrja masive e qytetarëve arabë është arritje historike për Listën e Përbashkët, e cila iu përgjigj thirrjes së publikut për unitet dhe dëshmoi se është një forcë vendimtare, pa të cilën ndryshimi është i pamundur", tha Tibi në një deklaratë me shkrim të siguruar nga Anadolu.

"Ne ia shtrijmë dorën 'bllokut të ndryshimit' për të rrëzuar qeverinë Netanyahu-Ben-Gvir, proces që do të nisë me largimin e kryetarit të Parlamentit (Knessetit), Amir Ohana", shtoi ai.

Sipas një videoje të publikuar nga zyra e tij, Tibi u tha mbështetësve të Listës së Përbashkët, në një tubim në vendbanimin Tayibe, në Izraelin qendror, sot herët se zërat e tyre ishin "më të fuqishmit", pavarësisht përpjekjeve për ta "ndërprerë energjinë elektrike në qendrat e votimit dhe për ta penguar votimin".

"Ben Gvir krimineli, nuk do të jetë ministër i Policisë. I ka ardhur fundi", shtoi ai. Sipas medieve izraelite, blloku i Netanyahut pritej të fitojë 54 vende në Parlamentin prej 120 vendesh, shtatë më pak se shumica qeverisëse, kur janë numëruar 84.5 për qind e votave të zgjedhjeve parlamentare në Izrael.

Blloku opozitar i udhëhequr nga Eisenkot pritej të sigurojë 49 vende ndërsa partitë e përbëra kryesisht nga arabë pritej të fitonin 17 vende, sipas gazetës "The Times of Israel", e cila iu referua Komitetit Qendror të Zgjedhjeve.

Lista e Përbashkët Arabe pritej të fitonte 11 vende ndërsa Lista e Bashkuar Arabe (Ra’am) pritej të siguronte gjashtë vende.