Shqipëria po konsolidohet si një destinacion turistik gjithëvjetor, duke tërhequr vizitorë nga e gjithë bota me atraksione të të gjitha llojeve, nga kultura, arti, historia apo kulinaria.

Ministri i Turizmit, Kulturës dhe Sportit, Blendi Gonxhja bëri të ditur në një postim në rrjetet sociale se “nga janari në shtator 2025, Shqipëria ka mirëpritur 10.228.686 vizitorë, duke shënuar një rritje prej 6 për qind krahasuar me të njëjtën periudhë të vitit 2024”.

Sipas ministrit, ky trend pozitiv dëshmon zhvillimin e qëndrueshëm të sektorit të turizmit dhe përpjekjet e përbashkëta për promovimin e Shqipërisë si një destinacion mikpritës dhe gjithnjë e më tërheqës.

Harta e vendeve prej nga vijnë turistët po zgjerohet çdo vit, ndërsa numri i vizitorëve jashtë sezonit veror po rritet ndjeshëm.

Nga alpet te vija e gjatë bregdetare, Shqipëria ofron një paketë të plotë turistike për çdo tipologji turistësh, ndërsa çdo vit po zgjerohet po ashtu edhe harta e vendeve nga ata vijnë.

Turistët kanë zgjedhur Shqipërinë, jo vetëm për plazhet e bukura dhe klimën e favorshme, por edhe për zonat malore me peizazhe natyrore mbresëlënëse, qytetet e lashta me vlerë historike e kulturore si dhe mikpritjen dhe kuzhinën tradicionale.

Sot turizmi, jo vetëm që po gjeneron të ardhura të konsiderueshme për ekonominë, por gjithashtu po promovon Shqipërinë si një destinacion të qëndrueshëm për çdo stinë të vitit.