Türkiye nuk do të gjunjëzohet kurrë para provokimeve apo kërcënimeve, tha sot presidenti turk Recep Tayyip Erdoğan, një ditë pasi një kopje e librit të shenjtë mysliman, Kuranit u dogj në Suedi.
"Ne përfundimisht do t'u mësojmë monumenteve perëndimore të arrogancës se fyerja e myslimanëve nuk është liri e mendimit," u tha Erdoğan anëtarëve të Partisë për Drejtësi dhe Zhvillim (AK Partisë) nëpërmjet një video-mesazhi.
Türkiye do të "tregojë reagimin në mënyrën më të fortë derisa të kryhet një ballafaqim i vendosur kundër organizatave terroriste dhe armiqve të Islamit", shtoi ai.
“Aq sa ata që e kryejnë këtë krim, ata që e lejojnë nën maskën e lirisë së mendimit, ata që mbyllin sytë ndaj kësaj poshtërsie nuk do t'i arrijnë qëllimet e tyre,” tha presidenti turk.
Të mërkurën, një shtetas irakian dogji një kopje të librit të shenjtë mysliman, Kuranit, jashtë një xhamie në kryeqytetin suedez të Stokholmit.
Më 12 qershor, një gjykatë suedeze e apelit la në fuqi vendimin e një gjykate më të ulët për të anuluar ndalimin e djegies së Kuranit, duke vendosur se policia nuk kishte baza ligjore për të parandaluar dy protesta për djegien e Kuranit në fillim të këtij viti.
Në shkurt, policia refuzoi lejen për dy përpjekje për djegien e Kuranit, duke përmendur shqetësimet e sigurisë, pasi politikani danez i ekstremit të djathtë Rasmus Paludan dogji një kopje të Kuranit jashtë ambasadës turke në Stokholm në janar.
Më vonë, dy individë që tentuan të organizonin veprime provokuese jashtë ambasadave irakiane dhe turke në Stokholm apeluan vendimin.
Në prill, Gjykata Administrative e Stokholmit e ndryshoi vendimin, duke vendosur se rreziqet e sigurisë nuk ishin arsye të mjaftueshme për të kufizuar të drejtën për të demonstruar.
