Prokuroria Publike Evropiane (EPPO) të martën kreu kontrolle në Kolegjin e Evropës në Bruges dhe në Shërbimin Europian për Veprim të Jashtëm (EEAS) në Bruksel, si pjesë e një hetimi për dyshime për mashtrim që lidhet me trajnime të financuara nga BE-ja për diplomatët e rinj.
Në një deklaratë, EPPO konfirmoi se kontrollet u kryen nga Policia Federale e Belgjikës (FGP West-Flanders) në disa ndërtesa të Kolegjit të Evropës, në selinë e EEAS-it, si dhe në banesat private të të dyshuarve.
EPPO-ja tha se tre persona janë ndaluar.
Operacioni u krye me mbështetjen e Zyrës Evropiane Kundër Mashtrimit (OLAF), pasi u autorizua nga një gjyqtar hetues.
Hetimi lidhet me projektin European Union Diplomatic Academy, një program trajnimi nëntëmujor për diplomatët e rinj nga vendet anëtare të BE-së, i cili iu dha Kolegjit të Evropës gjatë viteve 2021–2022 pas një tenderi të shpallur nga EEAS.
Sipas EPPO-së, hetuesit po shqyrtojnë nëse përfaqësues nga Kolegji i Evropës kanë pasur qasje paraprake në informacione konfidenciale rreth kritereve të përzgjedhjes së tenderit dhe nëse mund të kenë pasur arsye të besonin se do ta fitonin kontratën para se EEAS ta publikonte zyrtarisht thirrjen për tender.
Autoritetet dyshojnë se mund të jetë shkelur neni 169 i Rregullores Financiare të BE-së, që garanton konkurrencë të ndershme në procedurat e prokurimit, përmes ndarjes së informacionit të ndjeshëm gjatë procesit të tenderimit.
Para kontrolleve, EPPO-ja kërkoi heqjen e imunitetit për disa të dyshuar, kërkesë që u miratua.
Rasti fillimisht u raportua në OLAF dhe mund të përfshijë shkelje të mundshme si mashtrim në prokurime, korrupsion, konflikt interesi dhe shkelje të sekretit profesional.
Hetimi vazhdon nën mbikëqyrjen e një gjyqtari hetues në Flandrën Perëndimore.
EPPO-ja tha se të gjithë personat e përfshirë konsiderohen të pafajshëm derisa fajësia e tyre të vërtetohet nga gjykatat kompetente belge.
EPPO-ja është prokuroria e pavarur e BE-së përgjegjëse për hetimin dhe ndjekjen penale të veprave që dëmtojnë interesat financiare të Bashkimit.
