Putini zhvillon bisedë telefonike me Trumpin mbi negociatat me Ukrainën dhe situatën në Iran
Kremlini e quan bisedën njëorëshe “të drejtpërdrejtë, të hapur dhe konstruktive”.
Presidenti rus Vlladimir Putin zhvilloi të hënën një bisedë telefonike me homologun e tij amerikan Donald Trump për ta diskutuar konfliktin në Iran dhe negociatat trepalëshe me Ukrainën, raportoi agjencia shtetërore e lajmeve Tass.
Ndihmësi i Kremlinit Yury Ushakov u tha gazetarëve se telefonata u iniciua nga Trump dhe zgjati rreth një orë, duke e përshkruar bisedën si të drejtpërdrejtë, të hapur dhe konstruktive.
Fokusi ishte situata rreth konfliktit me Iranin dhe negociatat trepalëshe në vazhdim për një zgjidhje të çështjes ukrainase, me pjesëmarrjen e përfaqësuesve amerikanë.
Sipas Ushakovit, Trump përsëriti interesin e tij për një armëpushim të shpejtë dhe një zgjidhje afatgjatë për luftën në Ukrainë.
Dy liderët diskutuan gjithashtu Venezuelën dhe shprehën gatishmëri për të mbajtur komunikime të rregullta.