Presidenti francez Emmanuel Macron paralajmëroi të enjten se zgjerimi i shpejtë i vendbanimeve izraelite në Bregun Perëndimor të pushtuar përbën një “kërcënim ekzistencial” për shtetin e ardhshëm palestinez, duke e cilësuar këtë si të papranueshëm dhe në kundërshtim me të drejtën ndërkombëtare.

Duke folur në Paris në një takim që mblodhi ministra evropianë dhe arabë për të diskutuar rreth marrëveshjeve pas luftës në Gaza, Macron tha se ndërtimi i vendbanimeve “nxit tensione, dhunë dhe paqëndrueshmëri” dhe “bie drejtpërdrejt ndesh me planin amerikan të paqes dhe me ambicien tonë kolektive për rajonin”.

“Përshpejtimi i ndërtimit të vendbanimeve në Bregun Perëndimor paraqet një kërcënim ekzistencial për shtetin palestinez. Kjo nuk është vetëm e papranueshme dhe në kundërshtim me të drejtën ndërkombëtare, por edhe me objektivat e administratës së mëparshme amerikane, pasi rrezikon Marrëveshjet e Abrahamit”, tha Macron.

Ai bëri thirrje që të gjitha palët të shmangin hapjen e “një tjetër zone konflikti” ndërsa vazhdojnë përpjekjet për të siguruar një armëpushim të qëndrueshëm dhe për të rindërtuar Gazën.

“Duhet të qëndrojmë shumë vigjilentë ndaj situatës në Bregun Perëndimor”, tha ai, duke shtuar: “Vetëvendosja dhe krijimi i shtetit, uniteti i Gazës dhe i Bregut Perëndimor nën Autoritetin Palestinez, nuk duhet të mbeten objektiva të paqarta”.

Në këtë kontekst, shtoi ai, orët në vijim do të jenë vendimtare.

“Dua të theksoj para së gjithash se Izraeli, në këtë moment, duhet të miratojë këtë plan, i cili më në fund u ofron familjeve që në ankth çnjerëzor presin të dashurit e tyre një mundësi për ribashkim, ndërsa i ofron popullit izraelit një perspektivë të re përtej një lufte të pafundme”, tha Macron.

Ai theksoi se marrëveshja historike e arritur mbrëmjen e djeshme në Sharm el-Sheikh, që sipas tij pason “dy vite vuajtjesh të padurueshme”, duhet të hapë rrugën drejt një armëpushimi të përhershëm, lirimit të të gjithë pengjeve dhe sigurimit të menjëhershëm të ndihmës humanitare në Rripin e Gazës.

Macron gjithashtu konfirmoi përkushtimin e Francës ndaj zgjidhjes me dy shtete dhe mbështetjes për planin e armëpushimit të mbështetur nga ShBA-ja, që e synon stabilizimin e Gazës dhe avancimin e një zgjidhjeje politike që çon drejt bashkëjetesës paqësore në rajon.

“Presidenti Trump ka përcaktuar një kurs ambicioz për një marrëveshje gjithëpërfshirëse në Lindjen e Mesme. Ky angazhim është thelbësor dhe ne jemi këtu për ta mbështetur këtë vizion, një vizion të armëpushimit të qëndrueshëm dhe të stabilizimit të Gazës”, tha ai.