Gaza do të ketë nevojë për rreth 71,4 miliardë dollarë gjatë 10 viteve të ardhshme për rimëkëmbje dhe rindërtim pas 24 muajsh konflikti, sipas një vlerësimi përfundimtar të përbashkët të publikuar të hënën nga Bashkimi Evropian, OKB-ja dhe Banka Botërore.
Raporti “Vlerësimi i Shpejtë i Dëmeve dhe Nevojave për Gazën (RDNA)” thekson se 26,3 miliardë dollarë nga shuma totale nevojiten brenda 18 muajve të parë për t’i rikthyer shërbimet bazë, rindërtuar infrastrukturën kritike dhe mbështetur rimëkëmbjen ekonomike.
Sipas vlerësimit, dëmet në infrastrukturën fizike në Gaza arrijnë në 35,2 miliardë dollarë, ndërsa humbjet ekonomike dhe sociale vlerësohen në 22,7 miliardë dollarë.
Raporti thekson se sektorët më të goditur nga konflikti janë banimi, shëndetësia, arsimi, tregtia dhe bujqësia.
Sipas të dhënave, mbi 371.888 njësi banimi janë shkatërruar ose dëmtuar, më shumë se gjysma e spitaleve nuk funksionojnë, ndërsa pothuajse të gjitha shkollat janë shkatërruar ose dëmtuar.
Ekonomia e Gazës është tkurrur me 84%, ndërsa ndikimi në zhvillimin njerëzor përshkruhet si katastrofik, me një prapakthim prej 77 vitesh në zhvillim.
Rreth 1,9 milion persona janë zhvendosur, shpesh disa herë, ndërsa mbi 60% e popullsisë ka humbur shtëpitë e saj.
Raporti thekson se gratë, fëmijët, personat me aftësi të kufizuara dhe grupet e tjera të cenueshme po përballen me barrën më të rëndë të krizës.
Dokumenti shërben si bazë analitike për planifikimin e rimëkëmbjes së hershme dhe rindërtimit në përputhje me Rezolutën 2803 të Këshillit të Sigurimit të OKB-së.
BE-ja dhe OKB-ja theksojnë se rimëkëmbja duhet të ecë paralelisht me ndihmën humanitare dhe të mbështesë një tranzicion drejt rindërtimit të gjerë që përfshin si Gazën ashtu edhe Bregun Perëndimor.
Ata gjithashtu nënvizojnë se rindërtimi duhet të udhëhiqet nga palestinezët dhe të jetë pjesë e një procesi më të gjerë politik drejt zgjidhjes me dy shtete, duke theksuar se për sukses janë të domosdoshme një armëpushim i qëndrueshëm, qasje humanitare, rikthimi i shërbimeve bazë, lëvizje e lirë e njerëzve dhe mallrave, struktura të qarta qeverisëse dhe mbështetje financiare ndërkombëtare.
