Sulmi iranian me dron godet rezervuarët e karburantit në aeroportin e Kuvajtit

Një sulm me dron iranian goditi rezervuarët e karburantit në Aeroportin Ndërkombëtar të Kuvajtit herët në mëngjesin e së mërkurës, duke shkaktuar një zjarr të madh, por pa viktima, sipas agjencisë shtetërore të lajmeve të Kuvajtit, KUNA.

Duke cituar Drejtorinë e Përgjithshme të Aviacionit Civil të Kuvajtit, agjencia raportoi se mjeti ajror pa pilot kishte në shënjestër një objekt për ruajtjen e karburantit që operohet nga Kompania e Furnizimit me Karburant të Aviacionit të Kuvajtit, duke shkaktuar dëme të konsiderueshme.

Nuk u raportuan të vdekur apo të plagosur, ndërsa ekipet e zjarrfikësve u angazhuan në vendngjarje.

Sulmi i fundit është në vazhdën e një seri goditjesh ndaj infrastrukturës kritike në Kuvajt, në një kohë të rritjes së tensioneve rajonale.

Ndërkohë, ministria e Brendshme e Bahreinit njoftoi se një zjarr i shkaktuar nga një sulm iranian në një nga objektet e saj është vënë nën kontroll.

Shtetet e Bashkuara dhe Izraeli kanë kryer sulme ajrore ndaj Iranit që nga 28 shkurti, duke vrarë më shumë se 1.340 persona deri më tani, sipas autoriteteve iraniane. Irani është kundërpërgjigjur me sulme me dronë dhe raketa që kanë në shënjestër Izraelin, si dhe Jordaninë, Irakun dhe vendet e Gjirit që strehojnë kapacitete ushtarake amerikane.

Konflikti ka çuar gjithashtu në rritjen e çmimeve të energjisë dhe ka ndërprerë transportin detar përmes Ngushticës së Hormuzit, një pikë kyçe globale për naftën, përmes së cilës kalon rreth 20 për qind e furnizimit botëror çdo ditë.