Türkiye nis ndërtimin e një porti hapësinor në Somali

Türkiye ka përfunduar studimet e nevojshme të fizibilitetit dhe projektimit për një port hapësinor që do të ndërtojë në Somali dhe faza e parë e ndërtimit ka nisur, njoftoi të martën ministri i Industrisë dhe i Teknologjisë, Mehmet Fatih Kacir.

Më herët gjatë ditës, presidenti Recep Tayyip Erdoğan ndau planet e Türkiyes për ngritjen e portit hapësinor gjatë një konference të përbashkët për media me presidentin e Somalisë, Hassan Sheikh Mohamud, në Istanbul.

Në një deklaratë për Anadolu mbi detajet e projektit, Kacir tha se porti po ndërtohet në tokë të ndarë për Türkiyen në Somali, në bazë të një marrëveshjeje bashkëpunimi të nënshkruar mes dy vendeve.

Duke theksuar se vendet e vendosura në rajonin ekuatorial kanë avantazhe teknike për sa i përket qasjes në hapësirë, ai tha: “Si rezultat i studimeve të fizibilitetit të kryera, Somalia doli si rajoni më i favorshëm për investim në port hapësinor.”

Ai shtoi se puna në kuadër të objektivit “Qasja në Hapësirë dhe Porti Hapësinor”, i përfshirë në Programin Kombëtar Hapësinor, po zhvillohet nën koordinimin e Ministrisë së Industrisë dhe Teknologjisë, me kontributin e institucioneve dhe organizatave përkatëse, në radhë të parë të Agjencisë Hapësinore Turke.

“Zotërimi i një porti hapësinor nga Türkiye është një hap strategjik që do ta pozicionojë vendin tonë si një aktor të pavarur, konkurrues dhe me ndikim global në aktivitetet hapësinore,” tha ai.

“Ky investim ofron përfitime afatgjata me efekt të lartë shumëfishues për ekonominë e hapësirës.”

Kacir theksoi se, para së gjithash, ky investim do ta mundësojë lëshimin plotësisht të pavarur në hapësirë të mjeteve lëshuese të satelitëve të zhvilluara në Türkiye dhe do të krijojë një ekosistem të qëndrueshëm dhe konkurrues industrial vendor në fushën e teknologjive të lëshimit.

Ky ekosistem, i cili do të thellohet në fusha kritike si motorët raketorë, teknologjitë e karburantit, sistemet e shtytjes, materialet e avancuara teknologjike, avionika dhe infrastruktura mbështetëse tokësore, do të sigurojë që përfitimet teknologjike të bëhen të përhershme dhe të eliminohet varësia nga jashtë, theksoi ai.

Kacir tha se porti hapësinor do të ketë kapacitet për t’i shërbyer tregut global komercial të hapësirës.

“Prestigj historik global në sektorin e hapësirës”

Ai theksoi se porti do të shndërrohet në një infrastrukturë strategjike që gjeneron të ardhura për Türkiyen përmes shërbimeve komerciale të lëshimit të satelitëve, aktiviteteve të testimit dhe proceseve të integrimit, të cilat do të rriten çdo vit, duke kontribuar njëkohësisht në zhvillimin e Somalisë.

Duke shpjeguar se vendndodhja e Somalisë pranë ekuatorit, dalja në det, kushtet e favorshme të motit për lëshime gjatë gjithë vitit dhe dendësia e ulët e trafikut ajror e detar ofrojnë avantazhe të rëndësishme për sigurinë dhe efikasitetin e lëshimeve, Kacir tha se këto përparësi do të mundësojnë orare fleksibile lëshimi, duke i bërë sistemet e Türkiyes konkurruese në nivel global.

Ai vuri në dukje se ky investim do ta vendosë Türkiyen mes pak vendeve në botë që kanë vendet e tyre të lëshimit.

“Shumë pak vende në botë kanë infrastrukturë të pavarur për lëshimin e satelitëve,” tha ai.

“Pozicionimi i Türkiyes në këtë ligë përfaqëson një moment historik për sa i përket pjekurisë teknologjike, pavarësisë strategjike dhe prestigjit global në sektorin e hapësirës,” shtoi ai.

Në fund, Kacir tha se porti hapësinor do të shërbejë si një levë strategjike që i siguron Türkiyes qasje të pavarur në hapësirë, forcon sigurinë kombëtare, thellon kapacitetin industrial dhe teknologjik dhe e ngre vendin në nivelin më të lartë të ekonomisë globale të hapësirës.