Presidenti i Dhomës së Deputetëve të Luksemburgut deklaroi të enjten se përparimet e Türkiyes në industrinë e mbrojtjes mund t’i hapin rrugën një bashkëpunimi më të ngushtë mes dy vendeve.

Duke folur në një konferencë të përbashkët për media në Ankara, pas takimeve dypalëshe dhe atyre mes delegacioneve me kryetarin e Parlamentit turk, Numan Kurtulmuş, Claude Wiseler deklaroi se “Türkiye ka një industri shumë të fuqishme të mbrojtjes”.

“Ne e dimë se Türkiye ka bërë përparime shumë të rëndësishme në këtë drejtim. Prandaj, besoj se mund të krijohen partneritete të rëndësishme në komunikim dhe shkëmbim informacioni sa u përket politikave të mbrojtjes”, tha ai.

Duke theksuar se marrëdhëniet mes Türkiyes dhe Luksemburgut mund të forcohen më tej, Wiseler kujtoi se dy vendet po shënojnë 80-vjetorin e vendosjes së marrëdhënieve diplomatike.

Duke vënë në pah bashkëpunimin dypalësh, Wiseler tha:

“Ne kemi qenë gjithmonë partnerë. Natyrisht, kemi diskutuar vazhdimisht çështje të ndryshme, kemi zhvilluar bisedime dhe kemi mbajtur kontakte. Megjithatë, duke pasur parasysh situatën aktuale gjeopolitike në botë, ky bashkëpunim dhe këto marrëdhënie duhet të marrin një shtysë të re dhe të ngrihen në një nivel tjetër”.

“Kjo është pikërisht arsyeja pse ne nuk po kërkojmë partnerë të rinj. Ju jeni tashmë një partner i kahershëm për ne, por dëshirojmë ta çojmë këtë partneritet në një fazë tjetër, në një nivel më të lartë”, shtoi ai.

Luksemburgu ka mbështetur që nga fillimi anëtarësimin e Türkiyes në BE

Nga ana e tij, Kurtulmuş deklaroi se Luksemburgu ka qenë një nga vendet evropiane mike të Türkiyes, që ka mbështetur procesin e anëtarësimit të saj në Bashkimin Evropian që nga fillimi.

“Prandaj, e konsideroj detyrë timen t'i falënderoj edhe një herë publikisht”, tha ai.

Duke theksuar se Türkiye ka mbajtur gjithmonë qëndrimin se diplomacia duhet të jetë rruga kryesore për zgjidhjen e të gjitha problemeve rajonale, Kurtulmuş tha se vendi i tij ka vazhduar të luajë një rol të rëndësishëm ndërmjetësues në luftën mes Rusisë dhe Ukrainës që nga fillimi i saj.

“Ne kemi deklaruar gjithashtu se lufta e nisur nga ShBA-ja dhe Izraeli kundër Iranit tashmë është shndërruar në një spirale të pafundme tensionesh, nga e cila nuk do të përfitojnë në asnjë mënyrë as këto dy vende, as vendet e rajonit dhe as bota”, tha ai.

Kurtulmuş deklaroi se gjatë takimit diskutuan gjithashtu qëndrimin agresiv të Izraelit në rajon, të cilin, sipas tij, e ka mbajtur prej kohësh, veprimet e tij që ndikojnë në vendet e rajonit dhe, në veçanti, “veprimet çnjerëzore” kundër popullit palestinez.

“Shprehëm vlerësimin tonë të lartë për vendimin e Luksemburgut vitin e kaluar për njohjen e Shtetit të Palestinës dhe përcollëm urimet dhe falënderimet tona”, tha ai.

Kurtulmuş theksoi se një tjetër çështje me rëndësi rajonale ishin zhvillimet mes Azerbajxhanit dhe Armenisë.

“Diskutimet tona u përqendruan në rëndësinë jetike të këtij procesi normalizimi, me përfshirjen e Türkiyes, për sigurimin e paqes së qëndrueshme në Kaukaz dhe, rrjedhimisht, krijimin e lidhjeve të sigurta mes Lindjes dhe Perëndimit, si dhe mes Azisë, Kaukazit dhe Evropës”, tha ai.

Duke folur për Memorandumin e Mirëkuptimit për Përcaktimin e Zonave të Juridiksionit Detar mes Türkiyes dhe Libisë, Kurtulmuş deklaroi se “kjo marrëveshje nuk është lidhur kundër asnjë vendi të tretë”.

“Është një marrëveshje që do të mbrojë të drejtat sovrane të Türkiyes dhe Libisë në zonat e tyre të juridiksionit detar në Mesdhe”, shtoi ai.