Rritet mbështetja në Holandë për ndalimin e rrjeteve sociale për nën 16 vjeç

Mbështetja në Holandë për ndalimin e përdorimit të rrjeteve sociale nga fëmijët nën moshën 16 vjeç po rritet ndjeshëm, me rritjen më të madhe të vërejtur te Gjenerata Z, sipas një sondazhi vjetor të realizuar nga kompania kërkimore Newcom.

Bazuar në një sondazh përfaqësues me 6 685 të anketuar, Newcom ka konstatuar se 63 për qind e holandezëve tani mbështesin ndalimin e rrjeteve sociale për nën 16 vjeç, nga 57 për qind që ishte ky nivel vitin e kaluar, raportoi të premten transmetuesi publik NOS.

Nga 14.6 milionë banorë të Holandës që përdorin aktivisht platformat e rrjeteve sociale, 2.6 milionë thonë se aplikacione si WhatsApp, Facebook dhe TikTok i bëjnë të ndihen më pak të lumtur. Kjo shifër është rritur nga 2.4 milionë një vit më parë.

Studimi tregon gjithashtu se 7.2 milionë përdorues besojnë se aktivitete si lëvizja e vazhdueshme (scrolling), pëlqimi dhe shpërndarja e përmbajtjeve përbëjnë rrezik për shëndetin mendor, krahasuar me 6.9 milionë vitin e kaluar.

Drejtori i Newcom, Neil van der Veer, tha se njerëzit po përjetojnë më shumë se kurrë më parë efektet negative të rrjeteve sociale. 

“Ndikimi që ato kanë në mirëqenien tonë mendore dhe niveli i ndjenjës së vetmisë është bërë i jashtëzakonshëm”, u shpreh ai.

Ai shtoi se sa më aktivë të jenë njerëzit në rrjetet sociale, aq më shumë ka gjasa të raportojnë ankesa.

Si rezultat, rreth 5.5 milionë banorë të Holandës po përpiqen të reduktojnë kohën e kaluar në rrjetet sociale.

Mbështetja për rregullim më të rreptë po rritet në të gjitha grupmoshat, por ndryshimi është më i theksuar te përdoruesit e Gjeneratës Z, të moshës 16 deri në 28 vjeç.

Brenda këtij grupi, 60 për qind tani mbështesin ndalimin për nën 16 vjeç, krahasuar me 44 për qind vitin e kaluar.

“Një ndryshim i madh brenda një viti. Kjo thyen klishetë se të rinjtë nuk duan rregulla. Kjo është gjenerata që e ka përjetuar këtë; ata mund t’i shohin edhe më qartë rreziqet”, tha Van der Veer.

Të anketuarit përmendën disa arsye për mbështetjen e ndalimit, më së shpeshti faktin se fëmijët ende nuk janë të aftë të përballen me efektet e dëmshme të rrjeteve sociale.

Të tjerë thanë se një ndalim mund të ulë presionin online dhe të mbrojë më mirë të miturit nga përmbajtjet e papërshtatshme.

Kundërshtarët e ndalimit argumentojnë se rrjetet sociale mund t’i ndihmojnë gjithashtu fëmijët të zhvillojnë aftësi pozitive.

Australia ka vendosur një ndalim të rrjeteve sociale për fëmijët nën 16 vjeç në fund të vitit të kaluar, ndërsa disa vende evropiane po shqyrtojnë politika të ngjashme, dhe Komisioni Evropian po e analizon gjithashtu këtë çështje.