Japonia lëshoi me sukses një anije kozmike për misionin e parë në botë për të mbledhur mostra shkëmbinjsh dhe rëre nga një hënë e Marsit, sipas agjencisë hapësinore të vendit.
Sonda Martian Moons eXploration (MMX) u nda me sukses nga raketa H3 dhe hyri në orbitën e planifikuar, njoftoi Agjencia Japoneze e Kërkimeve Hapësinore (JAXA), sipas Agjencisë së Lajmeve Kyodo.
Raketa u nis nga Qendra Hapësinore Tanegashima në jugperëndim të Japonisë në orën 04:41 sipas kohës lokale.
Menaxheri i projektit të JAXA-s, Makoto Arita tha se anija kozmike kishte arritur orbitën e planifikuar me "saktësi të jashtëzakonshme".
Anija kozmike, me peshë 4.480 kilogramë, do të udhëtojë drejt Fobos-it, hënës më të madhe të Marsit dhe është planifikuar të hyjë në orbitën e Marsit në gusht të vitit 2027.
Një rover franko-gjerman do të ulet fillimisht në Fobos ndërsa më pas anija kozmike japoneze do të kryejë dy ulje të planifikuara për të mbledhur mostrat.
Më pas, sonda do të vëzhgojë hënën e dytë të Marsit, Deimos, përpara se të largohet nga orbita e planetit në nëntor të vitit 2030. Pritet që mostrat të mbërrijnë në Tokë në korrik të vitit 2031.
Kryeministrja japoneze, Sanae Takaichi përshëndeti lëshimin, duke shprehur shpresën se ky mision historik do të jetë i suksesshëm.
Lëshimi ishte planifikuar fillimisht për vitin 2024, por u shty pas dështimit të fluturimit të parë të raketës H3 në vitin 2023.
Misioni ndërkombëtar MMX synon të përcaktojë se si u formuan hënat e Marsit dhe të avancojë teknologjitë për eksplorimet e ardhshme planetare.
