Dhoma e Përfaqësuesve e Libisë miratoi njëzëri të martën marrëveshjen për përcaktimin e kufijve detarë me Türkiyen, duke ndryshuar qëndrimin e mëparshëm kundër marrëveshjes dhe vendimin për ndërprerjen e marrëdhënieve politike me Ankaranë, sipas një deklarate të parlamentit libian.

Në një deklaratë të lëshuar në Bengazi, parlamenti njoftoi se ligjvënësit votuan njëzëri për miratimin e memorandumit të mirëkuptimit të nënshkruar mes Türkiyes dhe ish-Qeverisë së Pajtimit Kombëtar të Libisë, për përcaktimin e zonave të juridiksionit detar në Detin Mesdhe.

Parlamenti shfuqizoi gjithashtu Rezolutën nr. 1 të vitit 2020, e cila kundërshtonte ratifikimin e dy memorandumeve të mirëkuptimit të nënshkruara mes Libisë dhe Türkiyes.

Sipas deklaratës, ligjvënësit votuan gjithashtu njëzëri për shfuqizimin e Rezolutës nr. 6 të vitit 2020, e cila kërkonte ndërprerjen e marrëdhënieve politike me Ankaranë.

Türkiye dhe Libia nënshkruan marrëveshjen për juridiksionin detar në nëntor të vitit 2019, me qëllim përcaktimin e kufijve të zonave të tyre përkatëse detare në Mesdhe.

Votimi i së martës shënon një ndryshim të qëndrimit të mëparshëm të parlamentit libian, i cili kishte kundërshtuar marrëveshjet dhe kishte mbështetur ndërprerjen e marrëdhënieve politike me Türkiyen.