Egjipti: Siria e re “nuk përbën kërcënim” për rajonin
Egjipti dhe Türkiye synojnë ta rrisin tregtinë dypalëshe në 15 miliardë dollarë në vitet e ardhshme, thotë Badr Abdelatty.
Ministri i Jashtëm egjiptian, Badr Abdelatty, përsëriti të mërkurën mbështetjen e plotë për sigurinë, stabilitetin dhe sovranitetin e Sirisë, duke theksuar se “Damasku nuk përbën kërcënim për vendet e rajonit”.
Duke folur në një konferencë të përbashkët për media me ministrin e Jashtëm turk, Hakan Fidan, në Ankara, Abdelatty tha se zhvilloi “konsultime të frytshme” me homologun e tij për çështje të ndryshme dypalëshe dhe rajonale me interes të përbashkët.
Ai shtoi se Egjipti dhe Türkiye po përgatiten të mbajnë së shpejti në Kajro sesionin e dytë të Këshillit të Bashkëpunimit Strategjik të Nivelit të Lartë, me pjesëmarrjen e presidentit Recep Tayyip Erdoğan.
Abdelatty theksoi se Kajroja dhe Ankara synojnë ta rrisin tregtinë dypalëshe në 15 miliardë dollarë në vitet e ardhshme, duke vënë në dukje “momentin e paprecedentë” në marrëdhëniet ekonomike mes dy vendeve.
Sa i përket Gazës, kryediplomati egjiptian bëri thirrje për mbajtjen e shpejtë të një konference për rindërtimin dhe për hyrjen e menjëhershme të ndihmave mjekësore, duke theksuar urgjencën e veprimit humanitar “me afrimin e dimrit”.