Shqipëria ka regjistruar rritje prej 6,8 për qind të turistëve të huaj që hynë në vend gjatë muajit dhjetor 2025, krahasuar me të njëjtin muaj të vitit 2024, sipas të dhënave të publikuara nga Instituti i Statistikave (INSTAT).

Të dhënat vulosin bilancin vjetor: 12.466.038 shtetas të huaj kanë vizituar Shqipërinë gjatë vitit që lamë pas.

Shifra tregon një rritje vjetore prej 6,6 për qind krahasuar me vitin 2024, duke dëshmuar se trendi rritës i Shqipërisë si destinacion turistik dhe tranzit nuk ishte i përkohshëm.

Vetë gjatë muajit dhjetorit, 698.742 shtetas të huaj hynë në territorin e vendit, ndërsa daljet e tyre arritën në 638.680 persona, duke shënuar një rritje prej 5,5 për qind krahasuar me një vit më parë.

INSTAT-i bën të ditur se flukset e lëvizjes së shtetasve shqiptarë dhe të huaj drejt dhe nga Shqipëria vijuan të shënojnë rritje edhe gjatë muajit dhjetor 2025.

Gjatë muajit dhjetor 2025, në territorin e Republikës së Shqipërisë kanë hyrë gjithsej 1.542.889 shtetas shqiptarë dhe të huaj, duke shënuar një rritje prej 7,0 për qind krahasuar me të njëjtin muaj të vitit 2024. Ndërkohë, numri i daljeve nga territori i vendit ka arritur në 1.353.137 shtetas shqiptarë dhe të huaj, ose 8,1 për qind më shumë krahasuar me dhjetorin e vitit të kaluar.

Sipas INSTAT-it, hyrjet e shtetasve shqiptarë gjatë muajit dhjetor 2025 janë regjistruar në 844.147 persona, duke pësuar një rritje prej 7,1 për qind krahasuar me dhjetorin 2024. Edhe daljet kanë shënuar rritje. Gjatë dhjetorit 2025, nga Shqipëria kanë dalë 714.457 shtetas shqiptarë, ose 10,6 për qind më shumë krahasuar me dhjetorin 2024.