Një oficer i Forcave Ajrore të Greqisë, i arrestuar nën dyshimin se ka rrjedhur informacione te rivali i madh i ShBA-së, ka pranuar se ka spiunuar për Kinën.

Sipas transmetuesit publik ERT, koloneli 54-vjeçar, i cili shërbente në Grupin e Trajnimit të Telekomunikacionit dhe Elektronikës 128 në zonën Kavouri, pranë Athinës qendrore, pranoi se i kishte përcjellë Kinës informacione të klasifikuara, përfshirë materiale që lidhen me NATO-n.

Transmetuesi bëri të ditur se ai gjithashtu identifikoi personin e tij lidhës kinez, i cili është i vendosur në Kinë.

ERT-ja raportoi se shërbimi i inteligjencës greke EYP filloi monitorimin e kolonelit pasi u sinjalizua nga inteligjenca amerikane për aktivitetet e tij. Oficeri kishte qasje në informacione të ndjeshme që lidhen si me Greqinë ashtu edhe me NATO-n.

Duke bashkëpunuar me inteligjencën ushtarake, agjencia EYP dje veproi për arrestimin e kolonelit, në momentin kur ai po përgatitej të dërgojë një tjetër paketë informacioni drejt Kinës.

Sipas transmetuesit, koloneli, ekspert në elektronikë dhe komunikime, mund t’i ketë shkaktuar dëme serioze sigurisë së Greqisë dhe NATO-s.

Raporti po ashtu tha se mbetet e paqartë nëse Kina i ka ndarë informacionet e marra me palë të tjera.