Më shumë se 65 mijë persona janë detyruar të largohen nga shtëpitë e tyre në shtetin amerikan të Uashingtonit, ndërsa disa zjarre të mëdha vazhdojnë të përfshijnë zonën, duke shkatërruar qindra objekte.
“Rreth 65 mijë persona janë evakuuar”, konfirmoi të hënën Kryqi i Kuq Amerikan. Organizata bëri të ditur se, sipas vlerësimeve paraprake, flakët kanë shkatërruar tashmë mbi 700 shtëpi, kryesisht në qarkun Spokane.
Sherifi i qarkut Spokane, John Nowels, deklaroi në një konferencë për media se autoritetet kanë arrestuar një person nën dyshimin për zjarrvënie të qëllimshme të shkallës së parë.
I dyshuari, 37-vjeçari Aaron F. Farinacci, u arrestua të hënën pasdite sipas kohës lokale dhe po mbahet në paraburgim me një garanci prej 1 milion dollarësh, tha Nowels.
Ai dyshohet se lidhet me zjarrin e njohur si Old Trails Fire, një nga disa vatrat aktive që aktualisht po kërcënojnë rajonin.
Ekipi i Menaxhimit të Zjarreve të Kompleksit Spokane njoftoi se kushtet më të favorshme të motit po u mundësojnë ekipeve të zjarrfikësve të përparojnë në kontrollin e vijave të zjarrit.
Sipas të dhënave të sistemit ndërinstitucional InciWeb, zjarret pranë qarqeve Spokane dhe Stevens kanë përfshirë 8.026 akra (3.248 hektarë) që nga e shtuna. Deri tani, ato nuk janë vënë fare nën kontroll.
Edhe pjesë të tjera të shtetit po përballen me zjarre shumë më të mëdha. Zjarri Sinlahekin është zgjeruar në 85 mijë akra (34.398 hektarë) që kur u shkaktua nga rrufeja më 26 korrik. Mbi 820 persona janë angazhuar në shuarjen e tij, por edhe ky zjarr mbetet pa asnjë përqindje kontrolli.
Ndërkohë, zjarri Little Giant, në veriperëndim të Leavenworth, ka djegur 51.298 akra (20.759 hektarë) në Pyllin Kombëtar Okanogan-Wenatchee.
Guvernatori i Uashingtonit, Bob Ferguson, tha se autoritetet kanë arritur të kontaktojnë pothuajse të gjithë personat që kishin kërkuar ndihmë, por ende po përpiqen të lidhen me 14 persona për të verifikuar nëse janë të sigurt.
Ferguson theksoi se këta 14 persona “nuk konsiderohen të zhdukur”, por autoritetet dëshirojnë të konfirmojnë gjendjen e tyre.
Sipas guvernatorit, deri më tani nuk është konfirmuar asnjë viktimë.
