Irani njoftoi të dielën se do të presë garancitë e FIFA-s për pjesëmarrjen në Kupën e Botës 2026.
“Kërkesa jonë ndaj FIFA-s për t’i zhvendosur ndeshjet e Iranit nga ShBA-ja në Meksikë mbetet e vlefshme, por ende nuk kemi marrë përgjigje. Nëse pranohet, pjesëmarrja e Iranit në Kupën e Botës do të jetë e sigurt. Megjithatë, FIFA nuk ka reaguar ende”, tha ministri i Sportit i Iranit, Ahmad Donyamali, për Anadolu.
Donyamali theksoi se lojtarët e kombëtares iraniane po vazhdojnë përgatitjet për Kupën e Botës. “Si ministër i Sportit, së bashku me Federatën e Futbollit të Iranit, do ta mbajmë ekipin gati për Kupën e Botës. Megjithatë, vendimi përfundimtar do të merret nga qeveria jonë”, shtoi ai.
Rregullat e FIFA-s për siguri
Duke kritikuar deklaratat e presidentit amerikan Donald Trump, i cili paralajmëroi për mungesë sigurie për ekipin iranian, Donyamali tha:
“Trump po bën deklarata kontradiktore dhe të paqëndrueshme. Nga ana tjetër, sipas rregullave të FIFA-s, siguria duhet të garantohet në vendin pritës. Por, duke qenë se Kupa e Botës po afrohet, dhënia e këtyre garancive është e pasigurt”.
Ai shtoi se siguria e çdo kombëtareje duhet të garantohet nga FIFA; në të kundërt, sipas tij, ndeshjet nuk duhet të zhvillohen në ShBA.
“Në këto kushte, mundësia që Irani të luajë në ShBA është shumë e ulët. Por, nëse ofrohen garancitë e nevojshme, qeveria jonë do të vendosë”, tha ai.
Kupa e Botës 2026, e organizuar nga ShBA-ja, Meksika dhe Kanadaja, do të zhvillohet nga 11 qershori deri më 19 korrik. Irani pritet të luajë ndeshjet e grupit në ShBA
Standarde të dyfishta
Duke folur për përjashtimin e Rusisë nga organizatat sportive pas luftës në Ukrainë, ndërsa nuk është marrë vendim ndaj Izraelit, Donyamali tha:
“Siç dihet, Izraeli mbështetet nga ShBA-ja. Edhe pse Irani është sulmuar dy herë në nëntë muajt e fundit, shohim standarde të dyfishta. Po ashtu, sulmet në Gaza kanë shkaktuar viktima të shumta. Këto standarde të dyfishta shihen edhe në sport. Shpresoj që bota e sportit të arrijë një nivel më të drejtë”.
Ai shtoi se organizatat ndërkombëtare dhe Këshilli i Sigurimit i OKB-së, sipas tij, shpesh tregojnë standarde të dyfishta dhe nuk veprojnë në mënyrë të barabartë.
