Administrata Trump do të shkurtojë ndihmat ushqimore për miliona përfitues

Shtëpia e Bardhë do të lëshojë vetëm gjysmën e pagesave të ndihmës ushqimore për muajin nëntor nën programin SNAP, pasi mbyllja hyri në ditën e saj të 36-të, duke lënë miliona amerikanë me të ardhura të ulëta pa mbështetjen e plotë. 

Çdo javë që kalon, më shumë amerikanë po e ndiejnë dhimbjen nga pezullimi i shërbimeve qeveritare.

Në zemër të konfliktit është financimi për të ndihmuar qytetarët amerikanë të mbulojnë sigurimet shëndetësore në kuadër të Aktit të Kujdesit të Përballueshëm, i njohur si Obamacare.

Këto subvencione, një shpëtim për më shumë se 20 milionë njerëz, pritet të skadojnë në fund të vitit dhe, nëse Kongresi nuk vepron, primet do të rriten ndjeshëm kur të hapet periudha e re e regjistrimit të shtunën.

Por palët politike në Uashington janë të bllokuara, pasi demokratët refuzojnë të rihapin qeverinë pa një marrëveshje për të zgjatur subvencionet, ndërsa republikanët e Trump thonë se nuk do të negociojnë derisa qeveria të rihapet.

Financimi për SNAP, që mesatarisht jep rreth 356 dollarë në muaj për familje, skadoi të shtunën, duke lënë një në tetë amerikanë të pasigurt se si do të blejnë ushqime. Ligjvënësit shpresojnë te Trump.

Një gjykatës federal në Rhode Island, i mbështetur nga një vendim i ngjashëm në Massachusetts, i dha një lehtësim të përkohshëm fondit, duke urdhëruar Shtëpinë e Bardhë të premten të përdorë fondet e emergjencës për të paguar kuponët ushqimorë gjatë mbylljes, në një çështje të ngritur nga organizata bamirëse dhe grupe të tjera.

Demokratët kishin shtyrë Shtëpinë e Bardhë të përdorte fondet e emergjencës, por administrata argumentoi se nuk mund të përdorte ligjërisht atë fond, i cili, sipas saj, ishte i destinuar për katastrofa natyrore.

Programi WIC, ndihma ushqimore për gratë shtatzëna, nënat e reja dhe foshnjat, është gjithashtu në prag të kolapsit për shkak të mbylljes, ndërsa programet “Head Start” që sigurojnë ushqim dhe mbështetje familjare për 65,000 foshnja filluan mbylljen të shtunën.

Ligjvënës nga të dyja palët kanë shprehur shpresën se Trump do të ndërhyjë për të ndërmjetësuar një marrëveshje për subvencionet e kujdesit shëndetësor.

Në një postim të gjatë në Truth Social, Trump tha të premten se kishte udhëzuar avokatët e qeverisë të “qartësojnë sa më shpejt të jetë e mundur se si mund të financojmë ligjërisht SNAP”.

Por mbetet e paqartë se kur përfituesit e kuponëve ushqimorë do të marrin pagesat e tyre, dhe Shtëpia e Bardhë ka pranuar se mund të ketë vonesa të konsiderueshme për shkak të mbylljes.

“Ka një proces që duhet ndjekur”, tha Sekretari i Thesarit Scott Bessent për CNN të dielën.

“Kështu që duhet të kuptojmë cili është ky proces. Presidenti Trump dëshiron të sigurojë që njerëzit t’i marrin përfitimet e tyre ushqimore”.