Arabia Saudite dhe Katari kishin kapur dhe “arrestuar agjentë izraelitë të Mossadit që po planifikonin shpërthime në ato vende”, tha të hënën prezantuesi konservator amerikan, Tucker Carlson, sipas raportimit të Middle East Eye.
Në programin e tij, Carlson vuri në pikëpyetje motivet e Izraelit, duke pyetur: “Pse izraelitët do të kryenin shpërthime në vendet e Gjirit, të cilat gjithashtu po sulmohen nga Irani?”
Ai shtoi: “A nuk janë në të njëjtën anë?”
Më tej ai pretendoi: “Izraeli dëshiron të dëmtojë Iranin, dhe Katarin, dhe Emiratet e Bashkuara Arabe, dhe Arabinë Saudite, dhe Bahreinin, dhe Omanin dhe Kuvajtin”, duke argumentuar se Izraeli po nxit qëllimisht paqëndrueshmëri mes aleatëve arabë të Uashingtonit.
Në shkurt, autoritetet izraelite të sigurisë ndaluan përkohësisht Carlsonin dhe ekipin e tij të prodhimit në Tel Aviv, pasi ai zhvilloi një intervistë me ambasadorin e Uashingtonit në Izrael, Mike Huckabee.
Gjatë kësaj interviste, Huckabee tha se hebrenjtë kanë një “të drejtë hyjnore” për të kolonizuar tokën palestineze dhe hodhi poshtë idenë e një identiteti të veçantë kombëtar palestinez.
Shkëmbimi erdhi pas një mosmarrëveshjeje publike mes dy personave në internet. Carlson kishte kritikuar trajtimin “tronditës” të të krishterëve nga Izraeli dhe kishte akuzuar Huckabeen se nuk po bënte mjaftueshëm për të mbrojtur të krishterët që janë përballur me sulme nga kolonët izraelitë të paligjshëm në Bregun Perëndimor të pushtuar dhe në Jerusalem.
Në vitin 2025, pas një vizite tek refugjatët palestinezë nga Gaza në Katar, ku ai theksoi vrasjen e fëmijëve nga Izraeli, një organizatë lobuese proizraelite me bazë në ShBA-ja e shpalli Carlsonin “Antisemiti i Vitit”, duke përmendur kundërshtimin e tij ndaj asaj që e cilësoi si gjenocid të Izraelit në Gaza.
Deklaratat e fundit të Carlsonit vijnë në mes të sulmeve të vazhdueshme ushtarake të ShBA-së dhe Izraelit kundër Iranit. Ofensiva e përbashkët ka vrarë Udhëheqësin Suprem të Iranit, Ali Khamenei, disa zyrtarë të lartë dhe qindra civilë. Sulmi më i ashpër deri tani ndodhi të shtunën, kur mbi 100 vajza u vranë në një goditje ndaj një shkolle në jug të Iranit.
Irani është kundërpërgjigjur duke goditur baza amerikane në të gjithë rajonin dhe duke ndërprerë rrugë kyçe të tregtisë së naftës.
