Në Shqipëri vazhdojnë protestat kundër qeverisjes në vend, mbi çështjen e projektit turistik në zonën e Zvërnecit në Qarkun e Vlorës dhe kundër ndërtimeve në zona të mbrojtura.

Edhe sot mijëra qytetarë janë mbledhur në Tiranë në ditën e 30-të të protestës, duke e kërkuar dorëheqjen e kryeministrit Edi Rama dhe krijimin e një qeverie teknike.

Protestuesit janë mbledhur në Sheshin “Skënderbeu”, për të vijuar drejt Bulevardit “Dëshmorët e Kombit” dhe para selisë së Kryeministrisë së Shqipërisë. Një grup i protestuesve gjithashtu kanë marshuar edhe drejt ambienteve të Universitetit Politeknik të Tiranës.

Raportohet se protestës së sotme i janë bashkuar edhe eurodeputetë.

Ashtu si në protestat e kaluara, pas qëndrimit disa orë në bulevard, protestuesit marshojnë në rrugët e kryeqytetit.

Ndërkohë, të rinjtë kanë marrë pjesë në mënyrë masive në protestat në javët e fundit, si dhe shqiptarë të diasporës nga disa shtete, të cilët gjithashtu kërkojnë largimin e klasës aktuale politike.

Të iniciuara nga aktivistë dhe të mbështetura nga qytetarët, protesta është zgjeruar edhe mbi çështje të tjera, si krijimi i një qeverie teknike, shfuqizimin kuadrit ligjor që lidhet me investitorët strategjikë, shfuqizimin ligjit të njohur si "Paketa e Maleve" dhe anulimin e ndryshimeve në ligjin për zonat e mbrojtura.

Në javët e fundit janë organizuar protesta të ngjashme edhe në qytete të tjera të Shqipërisë, ndërkohë janë mbajtur protesta edhe nga shqiptarët që jetojnë në disa vende të Evropës.

Gjatë një proteste më 30 maj në zonën e Zvërnecit u shënuan incidente, ku sipas pamjeve të publikuara në rrjetet sociale, disa roje të një kompanie private të sigurisë tërhoqën zvarrë një qytetar, duke shkaktuar më pas fillimin e protestave në Tiranë.

Në lidhje me çështjen, kryeministri Rama ka deklaruar se projekti në Zvërnec po i ndjek procedurat ligjore dhe mjedisore, duke shtuar se deri më tani nuk ka pasur një projekt përfundimtar apo studim të plotë të ndikimit në mjedis.