Delegacioni i Përhershëm i Türkiyes në Bashkimin Evropian organizoi të premten një panel në Bruksel si pjesë e Ditës Ndërkombëtare të Zero Mbetjeve, e cila shënohet çdo vit më 30 mars, duke nxjerrë në pah përpjekjet për të luftuar mbeturinat ushqimore.
Paneli u mbajt për të shënuar përvjetorin e kësaj dite, e cila u shpall pas miratimit unanim të një rezolute për Zero Mbetje në Asamblenë e Përgjithshme të Kombeve të Bashkuara më 14 dhjetor 2022, nën udhëheqjen e Türkiyes dhe me 105 vende bashkësponsorizuese.
Në fillim të panelit, i cili këtë vit u mbajt nën temën “Mbetjet Ushqimore”, u shfaq një videomesazh nga Zonja e Parë turke, Emine Erdoğan, kryetare e Bordit Këshillimor të Nivelit të Lartë të OKB-së për Zero Mbetje.
Në fjalimin e hapjes, ambasadorja Yaprak Balkan, përfaqësuese e përhershme e Türkiyes në BE, tha se kriza e mbeturinave është një pjesë e rëndësishme e krizës planetare të trefishtë: ndryshimet klimatike, humbja e biodiversitetit dhe ndotja.
“Zero Mbetje nuk është thjesht një slogan, por një kornizë veprimi”, tha Balkani, duke theksuar se tema e këtij viti është mbetjet ushqimore.
Ajo vuri në dukje se rreth 1 miliard tonë ushqim shkojnë dëm çdo vit, duke shtuar se kjo korrespondon me pothuajse një të pestën e ushqimit total të disponueshëm për konsumatorët.
Duke iu referuar kontradiktës midis mbeturinave ushqimore dhe urisë, Balkani tha: “Reduktimi i mbetjeve dhe garantimi i sigurisë ushqimore janë një domosdoshmëri socio-ekonomike dhe morale.”
Ajo gjithashtu theksoi se qasja e zero mbetjeve do të jetë ndër prioritetet gjatë procesit të presidencës së Türkiyes në COP31 dhe nënvizoi se të gjithë segmentet e shoqërisë duhet të veprojnë së bashku për të zgjidhur çështjet e klimës dhe mbeturinave.
Paneli i moderuar nga këshilltarja e Mjedisit, Elif Gökçe Öz, përfshiu folës si Klaus Berend – shef i Drejtorisë së Përgjithshme për Shëndetësi dhe Siguri Ushqimore të Komisionit Evropian, Veronika Hunt Safrankova – drejtore e Zyrës së Programit të OKB-së për Mjedisin në Bruksel, si dhe Esra Tat – drejtoreshë ekzekutive e “ZeroWaste Europe”.
