Kryeministri serb, Gjuro Macut, ka propozuar që qeveria t’i paraqesë presidentit Aleksandar Vuçiq një propozim zyrtar për shpërndarjen e Kuvendit Kombëtar.

“Propozoj që Qeveria e Republikës së Serbisë, në përputhje me Kushtetutën, t’i propozojë presidentit të Republikës shpërndarjen e Kuvendit Kombëtar dhe shpalljen e zgjedhjeve për deputetë”, tha Macut gjatë një seance parlamentare.

Sipas transmetuesit publik RTS, qeveria miratoi propozimin e kryeministrit Macut gjatë një seance të jashtëzakonshme.

Macut deklaroi se zgjedhjet e ardhshme ofrojnë mundësi për forcimin e institucioneve, uljen e tensioneve politike dhe refuzimin e politikës së përjashtimit. Ai gjithashtu theksoi se deri në zgjedhjen e një qeverie të re, kabineti aktual do të vazhdojë t’i kryejë detyrat e tij me të njëjtin nivel përgjegjësie dhe ritmi.

“Një mandat ka fundin e tij, por përgjegjësia jonë ndaj shtetit vazhdon çdo ditë. Jam i bindur se kjo qeveri edhe në të ardhmen do të vazhdojë në rrugën që ka përcaktuar”, tha Macut.

Propozimi për shpërndarjen e parlamentit është një hap i domosdoshëm procedural përpara se të mund të shpallen zyrtarisht zgjedhjet e parakohshme parlamentare.

Presidenti Vuçiq më herët ka bërë të ditur se do t’i shpallë zgjedhjet më së voni më 9 ose 10 shtator, ndërsa votimi pritet të zhvillohet më 18 ose 25 tetor.

Sipas kushtetutës, presidenti duhet të nxjerrë dekret për shpërndarjen e parlamentit brenda 72 orëve nga marrja e propozimit të qeverisë.