Meksika: ShBA-ja nuk ishte e përfshirë në operacionin që çoi në eliminimin e liderit të kartelit

Presidentja e Meksikës, Claudia Sheinbaum, deklaroi të hënën se Shtetet e Bashkuara nuk ishin të përfshira drejtpërdrejt në operacionin ushtarak që çoi në vdekjen e liderit të fuqishëm të Kartelit të Gjeneratës së Re të Jalisco-s (CJNG), dhe se ShBA-ja kishte ofruar vetëm inteligjencë për qeverinë.

Nemesio Oseguera Cervantes, i njohur si “El Mencho”, u vra nga forcat meksikane të dielën në zonat malore të pyllëzuara të Tapalpës, një komunë në shtetin perëndimor meksikan të Jaliscos.

Sheinbaum konfirmoi në një konferencë për shtyp se vendi është nën kontroll dhe se situata i është kthyer normalitetit.

Ajo tha se muajt që paraprinë operacionin për neutralizimin e Osegueras ishin planifikuar me kujdes nga forcat e sigurisë dhe të inteligjencës meksikane, ndërsa ShBA-ja kishte ofruar vetëm inteligjencë shtesë për qeverinë.

“Të gjitha operacionet u kryen nga forcat federale. Nuk pati asnjë pjesëmarrje të forcave të Shteteve të Bashkuara në operacion. Ajo që ekziston është një shkëmbim i gjerë informacioni”, tha ajo kur u pyet për rolin e ShBA-së.

Administrata e Sheinbaumit tha se qeveria dhe institucione të ndryshme, konkretisht Komanda Veriore e ShBA-së dhe INTERPOL-i, kontribuuan me përpjekje inteligjence për të ndihmuar në kapjen e Osegueras, por asnjë forcë e huaj nuk luajti rol në planifikimin apo ekzekutimin e veprimeve që i dhanë fund sundimit të El Menchos.

“Marrëveshja me Shtetet e Bashkuara bazohet kryesisht në shkëmbimin e inteligjencës. Në këtë rast, u dha informacion nga qeveria e Shteteve të Bashkuara… Por i gjithë operacioni, që nga planifikimi i tij, ishte përgjegjësi e forcave federale”, shtoi ajo.

Sipas Sekretarit të Mbrojtjes Kombëtare të Meksikës, gjeneralit Ricardo Trevilla Trejo, autoritetet arritën të kontaktonin një partnere romantike të liderit të kartelit, e cila konfirmoi se Oseguera fshihej në komunën e Tapalpës, Jalisco, më 21 shkurt.

Objektivi fillestar i operacionit ishte arrestimi i Osegueras, por ai u plagos për vdekje pasi ekipi i tij i sigurisë reagoi dhunshëm ndaj forcave meksikane.

“Gjithçka që lidhej me partneren e tij, bashkëpunëtorët dhe rrethin e tij të ngushtë erdhi nga inteligjenca jonë ushtarake. Kishte një sasi të madhe informacioni shtesë, shumë të rëndësishëm, të ofruar nga Shtetet e Bashkuara, por pasi gjithçka u integrua dhe u analizua siç duhet, na dha vendndodhjen e tij të saktë”, tha Trevilla.

Në maj të vitit 2016, Departamenti Amerikan i Shtetit e shtoi zyrtarisht El Menchon në listën e personave më të kërkuar, dhe ai kërkohej nga një gjykatë në Distriktin Perëndimor të Teksasit për akuza që lidhen me trafik droge dhe pastrim parash.

Në gusht 2018, Zyra e Prokurorit të Përgjithshëm të Meksikës ofroi rreth 1,5 milionë dollarë për informacion që çonte në kapjen e tij. Në dhjetor 2024, qeveria amerikane ofroi një shpërblim prej 15 milionë dollarësh.

Të hënën, Zyra e Prokurorit të Përgjithshëm të Meksikës konfirmoi identitetin e Osegueras pas një analize forenzike dhe ADN-je të trupit të tij, sipas Sekretarit të Sigurisë dhe Mbrojtjes Civile, Omar Garcia Harfuch.

“Ata tashmë e kanë identifikuar dhe konfirmuar”, tha Harfuch.

Pas lajmit për vdekjen e Oseguera-s nga forcat meksikane, vendi përjetoi një reagim të dhunshëm në disa shtete. Sipas autoriteteve të sigurisë meksikane, u raportuan deri në 252 bllokada rrugore në 20 shtete, si dhe biznese të djegura dhe përplasje me autoritetet.

“Në sulme frikacake pas veprimit për ndalimin e ‘El Menchos’, u regjistruan 27 sulme ndaj autoriteteve”, tha Harfuch.

Në total, autoritetet raportuan vdekjen e 34 personave të dyshuar si anëtarë të kartelit dhe arrestimin e 70 të tjerëve. Ndërkohë, forcat e sigurisë pësuan humbje, me 25 anëtarë të Gardës Kombëtare dhe një ushtar të vrarë.

Sheinbaum theksoi se situata tashmë është vënë plotësisht nën kontroll dhe se nuk ka më akte dhune në vend.

“Është paqësore, është e qetë dhe, më e rëndësishmja, ne po punojmë. Nëse sot do të lindte ndonjë situatë, ekziston një qendër kontrolli dhe komandimi dhe të gjitha forcat federale janë të koordinuara. Më e rëndësishmja, ne jemi të koordinuar me të gjitha shtetet e republikës”, tha ajo.