Presidenti i Azerbajxhanit, Ilham Aliyev, priti të martën në kryeqytetin Baku, ministrin e Jashtëm turk, Hakan Fidan.

Sipas një deklarate nga presidenca e Azerbajxhanit, Aliyev priti ministrin Fidan, i cili mbërriti në Azerbajxhan të martën për një vizitë dyditore.

Fidan i përcolli Aliyevit përshëndetjet e presidentit turk Recep Tayyip Erdoğan. Presidenti i Azerbajxhanit e falënderoi dhe i kërkoi Fidanit që t'i përcjellë përshëndetjet presidentit Erdoğan.

Gjatë takimit, të dy palët shprehën kënaqësinë për zhvillimin e suksesshëm të aleancës vëllazërore dhe strategjike midis Azerbajxhanit dhe Türkiyes në të gjitha fushat dhe forcimin e mëtejshëm të bashkëpunimit bazuar në parimin "një komb, dy shtete".

Zyrtarët theksuan rëndësinë e bashkëpunimit në sektorin e energjisë dhe shkëmbyen mendime për rrugë të reja drejt tregjeve ndërkombëtare në fushën e energjisë alternative.

Ata gjithashtu nënvizuan rëndësinë logjistike të Azerbajxhanit dhe Türkiyes, veçanërisht rolin e tyre si një urë kyçe midis Evropës dhe Azisë, dhe theksuan rëndësinë e koordinimit të aktiviteteve brenda organizatave ndërkombëtare.

Në takim u diskutua edhe për të ardhmen e marrëdhënieve dypalëshe, çështjet rajonale dhe çështje të tjera me interes të përbashkët.