Türkiye: Veprimet e Greqisë mbi statusin e ishujve shkelin traktatet dhe dëmtojnë fqinjësinë
Ankaraja zyrtare tha se nismat e Greqisë në lidhje me statusin e ishujve bien në kundërshtim me marrëveshjet që janë përfunduar në mënyrë të rregullt sipas të drejtës ndërkombëtare.
Ministria e Mbrojtjes Kombëtare të Türkiyes deklaroi të enjten se veprimet e Greqisë lidhur me statusin e disa ishujve shkelin traktatet ekzistuese dhe minojnë marrëdhëniet fqinjësore dypalëshe.
“Ishujt e Egjeut Lindor iu janë dhënë Greqisë me kusht që të mbahen në status joushtarak, sipas Traktatit të Paqes së Lozanës të vitit 1923 dhe Traktatit të Paqes së Parisit të vitit 1947. Në këtë kuadër, ishuj si Limni (sipas Traktatit të Lozanës) dhe Kerpe (sipas Traktatit të Parisit) duhet të kenë status joushtarak.
Statusi joushtarak është përcaktuar në traktate si një kusht themelor. Për rrjedhojë, shkelja e këtij statusi përbën një shkelje thelbësore të traktateve. Përpjekjet për të krijuar një fakt të kryer nuk prodhojnë pasoja juridike dhe nuk çojnë në përfundimin se statusi joushtarak ka marrë fund në mënyrë të njëanshme.
Kjo çështje është theksuar edhe nga nivelet më të larta të shtetit tonë. Nismat e Greqisë, që bien ndesh me traktatet e lidhura sipas rregullave të së drejtës ndërkombëtare dhe që cenojnë statusin e ishujve, jo vetëm krijojnë shkelje juridike, por edhe dëmtojnë marrëdhëniet tona të fqinjësisë dhe aleancës.
Në një kohë kur në rajonin tonë vazhdojnë krizat e sigurisë, është e papranueshme që mes aleatëve të NATO-s të lindin situata të tilla. Ne theksojmë se nuk i pranojmë përpjekjet e Greqisë, të cilat nuk i shërbejnë qëllimit real dhe synojnë të shfrytëzojnë krizat në rajonin tonë, dhe bëjmë të ditur se në këtë drejtim janë marrë të gjitha masat e nevojshme”, tha Ministria gjatë konferencës javore për shtyp.