Forcat jemenase goditën pistën e Aeroportit Ndërkombëtar të Sanasë, i cili kontrollohet nga Houthit, për ta penguar uljen e një avioni iranian, njoftoi Ministria e Mbrojtjes e Jemenit.

Në një deklaratë të publikuar nga agjencia zyrtare e lajmeve Saba, ministria tha të hënën se Houthit penguan uljen e avionëve jemenas në aeroportin e Sanasë dhe lejuan uljen e avionit iranian, "në shkelje të sovranitetit të territorit jemenas".

"Si rezultat, pista e aeroportit u godit", shtoi ministria. Më herët, ajo kishte bërë thirrje për evakuimin e aeroportit të Sanasë, duke paralajmëruar civilët të qëndrojnë larg zonës.

Në reagim, zëdhënësi ushtarak i Houthive, Yahya Saree, u zotua në një postim në platformën X se sulmi "nuk do të kalojë pa hakmarrje dhe ndëshkim".

Më herët, ministri jemenas i Informacionit, Moammar Al-Eryani, akuzoi Houthit se kanë sekuestruar një avion që i përket Komitetit Ndërkombëtar të Kryqit të Kuq (ICRC) në aeroportin e Sanasë dhe kanë penguar nisjen e tij.

Në një postim në X, Al-Eryani tha se grupi mbajti të ndaluar avionin, së bashku me pilotin dhe bashkëpilotin, duke e cilësuar këtë veprim si një "përshkallëzim të rrezikshëm" dhe një "shkelje flagrante" të së drejtës ndërkombëtare humanitare dhe të normave ndërkombëtare që mbrojnë misionet dhe personelin humanitar.

Ndërkohë, mediat iraniane raportuan se një avion iranian u ul në Aeroportin Al Hudajda, në perëndim të Jemenit, pak pasi forcat jemenase bombarduan pistën e Aeroportit Ndërkombëtar të Sanasë, të kontrolluar nga Houthit.

Sipas Press TV, avioni u ul në Al Hudajda, në bregdetin e Detit të Kuq, pasi pista e aeroportit të Sanasë u godit më herët gjatë ditës.