Agjencia e Lajmeve për Aktivistët e të Drejtave të Njeriut (HRANA) me seli në ShBA, tha të mërkurën se numri i të vdekurve nga protestat e fundit në Iran është rritur në 7.002.

Sipas HRANA-së, 52.941 persona janë arrestuar dhe 7.002 persona, përfshirë 214 personel sigurie, janë vrarë në incidentet që ndodhën gjatë demonstratave në pjesë të ndryshme të vendit.

HRANA-ja vuri në dukje se 11.730 raste të tjera janë ende duke u shqyrtuar. Agjencia kishte raportuar më parë numrin e të vdekurve si 6.984.

Protestat në Iran

Protestat në Iran filluan më 28 dhjetor 2025 në Pazarin e Madh të Teheranit, të udhëhequra nga tregtarët, për shkak të zhvlerësimit të shpejtë të monedhës vendase kundrejt valutave të huaja dhe thellimit të vështirësive ekonomike. Këto protesta u përhapën në të gjithë vendin.

Më 8 janar, autoritetet bllokuan aksesin në internet për shkak të përleshjeve që u shënuan gjatë demonstratave që u intensifikuan në kryeqytet, Teheran. Forcat e sigurisë ndërhynë më 8-9 janar dhe i shtypën protestat.

Në një deklaratë më 21 janar, Fondacioni i Iranit për Çështjet e Dëshmorëve dhe Veteranëve, duke cituar Organizatën e Mjekësisë Ligjore të vendit, njoftoi se në trazira kanë humbur jetën 3.117 persona, përfshirë personelin e sigurisë dhe civilët.

Fondacioni tha se 2.427 nga viktimat ishin forca sigurie dhe qytetarë civilë që dyshohet se u vranë nga "grupet e armatosura terroriste", ndërsa nuk u dhanë detaje të mëtejshme në lidhje me 690 të vdekurit.