Unioni Evropian i Transmetimeve (EBU) ka shtyrë votimin për të vendosur nëse Izraelit do t’i lejohet pjesëmarrja në Konkursin e Këngës së Eurovizionit 2026, duke iu referuar zhvillimeve të fundit në Lindjen e Mesme, raportuan mediat të martën.

Sipas BBC-së, u anulua takimi virtual i planifikuar për në nëntor, në të cilin duhej të merrej vendimi për këtë çështje.

EBU-ja njoftoi se kjo çështje tani do të shqyrtohet gjatë asamblesë së përgjithshme dimërore në dhjetor.

“Në dritën e zhvillimeve të fundit në Lindjen e Mesme, bordi ekzekutiv i EBU-së u pajtua se ekziston nevoja e qartë për një diskutim të hapur dhe personal,” citoi BBC-ja deklaratën e EBU-së pas mbledhjes së bordit të mbajtur më 13 tetor.

Debati për pjesëmarrjen e Izraelit është intensifikuar pas operacioneve të tij të vazhdueshme ushtarake në Gaza.

Disa vende pjesëmarrëse, përfshirë Spanjën, Irlandën, Slloveninë, Islandën dhe Holandën, kanë paralajmëruar bojkot të mundshëm nëse Izraeli merr pjesë në konkursin e ardhshëm në Vjenë.

Transmetuesi holandez AvroTros njoftoi muajin e kaluar se as armëpushimi e as ndryshimet në konflikt nuk do ta ndryshonin qëndrimin e tij për vitin 2026, por shtoi se pjesëmarrja e ardhshme mund të rishqyrtohet në varësi të rrethanave.

Transmetuesi kombëtar austriak ORF, i cili do të jetë mikpritës i konkursit në 2026, e përshëndeti vendimin e EBU-së për të shtyrë votimin.

Ministrja austriake e Punëve të Jashtme, Beate Meinl-Reisinger, më herët kishte deklaruar se arti nuk është arena e duhur për sanksione.

Transmetuesi izraelit Kan ende nuk është prononcuar për zhvillimin më të fundit.

Në shtator, Kan pohoi se Izraeli duhet të ketë të drejtë pjesëmarrjeje, duke iu referuar historikut të tij të suksesshëm në konkurrim.