Egjipti dhe Arabia Saudite kërkojnë armëpushim në Sudan dhe zbatim të plotë të marrëveshjes në Gaza
Ministri i Jashtëm i Egjiptit dhe ai i Arabisë Saudite biseduan me telefon për krizën në Sudan dhe në Rripin e Gazës.
Egjipti dhe Arabia Saudite theksuan të premten nevojën për një armëpushim në Sudan dhe zbatimin e plotë të marrëveshjes për Gazën, njoftoi Ministria e Punëve të Jashtme e Egjiptit.
Ministri egjiptian i jashtëm, Badr Abdelatty, zhvilloi një bisedë telefonike me homologun e tij saudit, princin Faisal bin Farhan.
Në deklaratën e ministrisë thuhet se të dy ministrat theksuan “lidhjet e thella dhe vëllazërore” midis dy vendeve dhe rritjen e bashkëpunimit në fushat politike, ekonomike dhe zhvillimore.
Ata konfirmuan rëndësinë e arritjes së një armëpushimi në Sudan dhe “krijimit të kushteve për një proces gjithëpërfshirës politik që ruan unitetin, sovranitetin dhe stabilitetin e Sudanit”.
Sudani ndodhet në luftë që prej prillit 2023, ndërmjet ushtrisë dhe forcave paraushtarake RSF (Forcat për Mbështetje të Shpejtë). Sipas Organizatës Botërore të Shëndetësisë, të paktën 40.000 persona kanë humbur jetën, ndërsa 12 milionë janë zhvendosur.
Javën e kaluar, RSF njoftoi se kishte pranuar t’i bashkohej një armëpushimi humanitar të propozuar nga grupi Quad (Egjipti, Arabia Saudite, ShBA-ja dhe Emiratet e Bashkuara Arabe).
Megjithatë, Abdel Fattah al-Burhan, kreu i Këshillit të Sovranitetit Kalimtar të Sudanit, hodhi poshtë çdo armëpushim apo marrëveshje paqeje me RSF-në derisa grupi “të dorëzojë armët”.
Muajin e kaluar, RSF-ja mori nën kontroll qytetin El-Fasher, kryeqytetin e shtetit Darfur i Veriut, mes raportimeve për masakra dhe krime kundër civilëve.
Abdelatty dhe bin Farhan diskutuan gjithashtu zhvillimet në Rripin e Gazës, duke theksuar rëndësinë e bashkëpunimit egjiptiano-saudit për ruajtjen e marrëveshjes së armëpushimit në enklavë.
Dy diplomatët e lartë theksuan nevojën për “zbatim të plotë të të gjitha dispozitave të marrëveshjes për të garantuar një armëpushim të qëndrueshëm dhe për të lehtësuar vuajtjet humanitare të palestinezëve”.
Marrëveshja e armëpushimit hyri në fuqi më 10 tetor, si pjesë e planit të paqes me disa faza të presidentit amerikan Donald Trump.
Megjithatë, Izraeli ka vazhduar ta shkelë marrëveshjen, duke shtyrë fillimin e fazës së dytë, e cila përfshin marrëveshje sigurie dhe administrative si dhe tërheqjen e trupave izraelite.
Që nga tetori 2023, më shumë se 69.000 palestinezë janë vrarë dhe mbi 170.700 janë plagosur nga sulmet izraelite në Gazë.