OKB-ja u bëri thirrje të hënën ShBA-së dhe Iranit të rifillojnë negociatat, ndërsa afrohet përfundimi i afatit 60-ditor për arritjen e një marrëveshjeje më të gjerë, duke paralajmëruar se konflikti nuk ka zgjidhje ushtarake.

Zëdhënësi i OKB-së, Stephane Dujarric, u tha gazetarëve se mesazhi i Sekretarit të Përgjithshëm Antonio Guterres ka mbetur i pandryshuar që kur ShBA-ja dhe Izraeli nisën sulmet ndaj Iranit më 28 shkurt.

“Mesazhi i tij është i njëjtë me atë që ka përcjellë që nga fillimi: ky konflikt nuk ka zgjidhje ushtarake”.

“Ai u kërkon Republikës Islamike të Iranit dhe Shteteve të Bashkuara të rifillojnë sa më shpejt negociatat për një zgjidhje paqësore dhe të qëndrueshme, të shmangin veprimet ushtarake dhe të zbusin retorikën që kemi dëgjuar ditët e fundit”, tha Dujarric.

Deklaratat e tij vijnë ndërsa periudha 60-ditore e negociatave po i afrohet fundit pa një marrëveshje gjithëpërfshirëse. Afati buron nga një mirëkuptim i arritur në qershor ndërmjet ShBA-së dhe Iranit, i cili përcaktoi një periudhë për negociatat drejt një marrëveshjeje më të gjerë.

Më herët, zëdhënësi i Ministrisë së Jashtme iraniane, Esmaeil Baqaei, tha se afati 60-ditor për bisedimet me ShBA-në, i vendosur pas memorandumit të mirëkuptimit të 17 qershorit, e kishte “humbur rëndësinë” pas atyre që ai i quajti shkelje “flagrante” nga Uashingtoni.

Dujarric u pyet gjithashtu për një takim të fundit në Izrael ndërmjet këshilltarit dhe dhëndrit të presidentit Donald Trump, Jared Kushner, dhe kryeministrit izraelit Benjamin Netanyahu.

“Nuk kam informacione të reja për takimet më të fundit”, tha ai.

Teherani dhe Uashingtoni ranë dakord për një armëpushim në prill dhe më pas nënshkruan në qershor një memorandum mirëkuptimi që synonte t’i jepte fund konfliktit ushtarak dhe të çonte në një marrëveshje të qëndrueshme paqeje.

Megjithatë, marrëveshja dështoi muajin e kaluar. Irani dhe ShBA-ja shkëmbyen sulme për gati dy javë, përpara se Trumpi të ndërpriste papritur bombardimet mes përpjekjeve për ringjalljen e marrëveshjes.