Holanda po avancon planet për krijimin e “qendrave të kthimit” për migrantët jashtë Bashkimit Evropian, me hapat e parë që pritet të ndërmerren brenda muajve të ardhshëm, raportoi të hënën Politico, duke cituar ministrin e Migracionit.

“Në mbarë Evropën, njerëzit po kërkojnë zgjidhje të besueshme dhe të zbatueshme për të rikthyer kontrollin mbi migracionin”, citohet të ketë thënë Bart van den Brink, zëvendëskryeministër dhe ministër i Migracionit i Holandës.

Ai shtoi se këto zgjidhje “po marrin formë” dhe konsiderohen të realizueshme nga pikëpamja ligjore.

Sistemi i propozuar parashikon që azilkërkuesit, kërkesat e të cilëve janë refuzuar në BE, të transferohen në qendra të vendosura jashtë territorit të bllokut, si pjesë e përpjekjeve për të frenuar migracionin e parregullt dhe për të përmirësuar procedurat e kthimit.

Sipas një letre që qeveria holandeze i ka dërguar parlamentit dhe që citohet nga Politico, Haga po shqyrton mundësinë e përpunimit të kërkesave për azil jashtë territorit të BE-së, në bashkëpunim me shtete të tjera anëtare.

Plani raportohet se po diskutohet me disa partnerë evropianë, përfshirë Greqinë, Gjermaninë, Austrinë dhe Danimarkën, të cilat kanë mbështetur thirrjet për masa më të rrepta të migracionit në BE.

Qendra e parë e kthimit pritet të ngrihet jashtë BE-së, megjithëse vendndodhja ende nuk është bërë publike, ndërsa negociatat me vendet pritëse të mundshme vazhdojnë.

Një vlerësim ligjor i porositur nga qeveria holandeze ka arritur në përfundimin se nuk ka pengesa ligjore për zbatimin e planit.

Propozimi vjen në një kohë kur institucionet e BE-së po finalizojnë reforma më të gjera për migracionin, mes debateve të vazhdueshme politike në shtetet anëtare lidhur me politikat e migracionit.