Sekretari i Energjisë i ShBA-së, Chris Wright, deklaroi të hënën se çmimet e naftës mund të arrijnë kulmin në javët e ardhshme, pasi ndërprerjet në transportin detar përmes Ngushticës së Hormuzit vazhdojnë të rrisin kostot e energjisë.

“Do të shohim çmime të larta të energjisë – dhe ndoshta edhe në rritje – derisa të rikthehet qarkullimi domethënës i anijeve përmes Ngushticës së Hormuzit,” tha Wright në konferencën Semafor World Economy conference në Uashington.

“Kjo ndoshta do të përkojë me kulmin e çmimit të naftës. Kjo mund të ndodhë në javët e ardhshme,” shtoi ai.

“Pasi të përfundojë konflikti (mes ShBA-së dhe Iranit) dhe energjia të fillojë të rrjedhë sërish, do të nisë presioni për uljen e çmimeve. Por kjo do të kërkojë kohë,” theksoi ai.

“Presidenti e dinte që në fillim se, nëse ndërpritet rrjedha e energjisë në afat të shkurtër, çmimet do të rriten,” tha Wright.

Ai shtoi se pritjet për një rënie të shpejtë të çmimeve janë jorealiste.

“Deri në verë është një afat ambicioz,” paralajmëroi Wright, duke theksuar se çdo lehtësim do të marrë kohë edhe pas rifillimit të furnizimit me energji.

Tregjet e naftës janë rritur ndjeshëm që nga fillimi i luftës ShBA-Izrael me Iranin më 28 shkurt, me Teheranin që ka bllokuar qasjen në Ngushticën e Hormuzit për shumicën e anijeve të huaja.

Në përgjigje, ShBA-ja ka ndërmarrë masa për vendosjen e një bllokade detare ndaj porteve iraniane, pasi bisedimet gjatë fundjavës në Islamabad, Pakistan, për përfundimin e luftës dështuan, pavarësisht një armëpushimi dyjavor të ndërmjetësuar nga Pakistani.

Komanda Qendrore e ShBA-së (CENTCOM) njoftoi se bllokada do të zbatohet në mënyrë të paanshme ndaj anijeve që hyjnë ose dalin nga portet iraniane në Gjirin Arabik dhe Gjirin e Omanit.