Presidenti ukrainas Volodymyr Zelensky tha sot se një grup ekspertësh u nisën për në Jordani më 5 mars për të ndihmuar ShBA-në t’i mbrojë bazat e saj ushtarake në vendin e Lindjes së Mesme.
Agjencia shtetërore e lajmeve ukrainase Ukrinform tha se ekipi po sjell me vete dronë interceptues.
“ShBA-ja na u drejtua me një kërkesë për ndihmë të enjten, më 5 mars, dhe të nesërmen ekipi ukrainas u nis për në Lindjen e Mesme. Ne iu përgjigjëm menjëherë. Unë thashë: ‘Po, sigurisht, do të dërgojmë ekspertët tanë”, tha Zelensky.
Ai shtoi se në ditët e para pas fillimit të operacionit amerikan dhe izraelit kundër Iranit, ai mori kërkesa për ndihmë nga udhëheqësit e Bahreinit, Emirateve të Bashkuara Arabe, Jordanisë, Kuvajtit, Katarit dhe Arabisë Saudite.
Një grup tjetër ekspertësh ukrainas thuhet se do të udhëtojnë në Lindjen e Mesme për të ndihmuar vendet të vlerësojnë aftësitë për t’u mbrojtur kundër dronëve iranianë pa përdorur interceptorë të shtrenjtë “Patriot”.
Zelensky tha se u kërkoi udhëheqësve arabë të nxisin Rusinë të ndalojë aktivitetet luftarake, në mënyrë që Kievi të lirojë disa forca për t’i ndihmuar ata.
