Organizata Botërore e Shëndetësisë (OBSh) ka certifikuar Danimarkën si vendin e parë të BE-së që eliminon transmetimin e HIV-it dhe sifilizit nga nëna tek fëmija, duke njohur përpjekjet e vazhdueshme për të siguruar që foshnjat të lindin të lira nga infeksionet.

"Eliminimi i transmetimit të HIV-it dhe sifilizit nga nëna tek fëmija shënon një arritje të madhe të shëndetit publik për Danimarkën", tha në një deklaratë të premten, Drejtori i Përgjithshëm i OBSh-së, Tedros Adhanom Ghebreyesus.

"Ky moment historik tregon se me një angazhim të fortë politik dhe investime të vazhdueshme në kujdesin parësor dhe shërbimet e integruara të shëndetit të nënës dhe fëmijës, vendet mund të mbrojnë çdo grua shtatzënë dhe të porsalindur nga këto sëmundje", shtoi ai.

Procesi i verifikimit konfirmon se Danimarka i ka përmbushur të gjitha objektivat e OBSh-së midis viteve 2021 dhe 2024, duke përfshirë shkallët e ulëta të transmetimit dhe mbulimin e lartë të testimit dhe trajtimit prenatal.

"Si vendi i parë i Bashkimit Evropian që arrin këtë moment historik të shëndetit publik, suksesi i Danimarkës është një dëshmi e forcës së sistemit të saj të shëndetit të nënës dhe angazhimit të saj të gjatë për t'i ofruar çdo gruaje shtatzënë kujdesin që i nevojitet", tha Drejtori Rajonal i OBSh-së për Evropën, Hans Henri P. Kluge.

Zyrtarët thanë se mbulimi universal shëndetësor, shqyrtimi i integruar gjatë shtatzënisë dhe sistemet e forta të të dhënave mbështetën suksesin.

"Ky vlerësim nga OBSh-ja është një moment krenarie për Danimarkën", tha ministrja e Shëndetësisë, Sophie Lohde.

Danimarka tani po punon drejt eliminimit të hepatitit B si pjesë e një qëllimi më të gjerë të “eleminimit të trefishtë", shtoi OBSh-ja.