Një eurodeputet nga Administrata e Qipros Greke ka paralajmëruar se investimet në rritje dhe blerjet e pronave nga izraelitët në Qipron greke rrezikojnë të ndryshojnë karakterin social dhe ekonomik të ishullit.

“Izraeli po e blen Qipron” përmes blerjeve në rritje të tokave dhe projekteve zhvillimore të realizuara nga investitorë dhe kompani izraelite, tha të shtunën Fidias Panayiotou në platformën X.

Panayiotou tha se investimet e huaja janë rritur ndjeshëm vitet e fundit, veçanërisht në sektorët e pasurive të paluajtshme dhe zhvillimit të tokave, ku izraelitët janë bërë ndër blerësit më të spikatur.

“Problemi është se ne varemi nga investimet izraelite që ekonomia jonë të ecë mirë”, tha ai, duke argumentuar se blerjet e përqendruara të pronave po krijojnë “qarqe të mbyllura banimi në zona të caktuara”.

Ai iu referua gjithashtu investimeve nga vende të tjera jashtë Bashkimit Evropian, përfshirë Rusinë, Ukrainën, Kinën, ShBA-në dhe Britaninë e Madhe, duke thënë se pronësia e huaj në vetvete nuk është domosdoshmërisht negative, por mund të bëhet problematike pa transparencë dhe mbikëqyrje.

Megjithatë, Panayiotou fajësoi atë që e përshkroi si kontroll të dobët, korrupsion dhe varësi të administratës greke të Qipros nga investimet e huaja, duke lejuar zgjerimin e pakontrolluar nga investitorë të huaj të pasur.

“Për shembull, nëse qeveria u lejon në mënyrë të njëanshme investitorëve të mëdhenj izraelitë të ndërtojnë çfarë të duan, ose nëse nuk kontrollon rezultatet, dhe nëse pas kompanive që investojnë qëndron një strukturë e cila shpesh konsiderohet qipriote, atëherë është logjike që ata të vijnë edhe më shumë për të investuar në Qipro”, shtoi ai.

Ai pretendoi gjithashtu se komunitetet izraelite në Administratën e Qipros Greke po zhvillojnë gjithnjë e më shumë infrastrukturë të veçantë, përfshirë shkolla ku ndjekin mësimin kryesisht izraelitët.

Duke bërë thirrje për rregullim më të fortë, Panayiotou tha se autoritetet duhet të miratojnë legjislacion për të rritur transparencën në blerjet e tokave dhe për të siguruar që ligjet të mos shkelen.

Ai kërkoi gjithashtu masa për forcimin e ekonomisë lokale, me qëllim uljen e varësisë nga kapitali i huaj dhe ndikimi i jashtëm në çështjet e brendshme.