Malajzia dënoi fuqimisht sulmin e fundit të okupatorëve ekstremistë izraelitë ndaj xhamisë Al-Aksa në Jeruzalem, përfshirë ngritjen e flamurit izraelit brenda vendit të shenjtë mysliman, duke e përshkruar aktin si provokim të rëndë dhe shkelje të shenjtërisë së tij.
Në një deklaratë të së martës, Ministria e Jashtme e Malajzisë tha se çdo përpjekje për të judaizuar xhaminë Al-Aksa është e neveritshme dhe përbën përdhosje të vendit.
Ajo tha se veprimet e fundit të okupatorëve, të mbështetura nga regjimi izraelit, synonin ndryshimin e realitetit në terren, si dhe karakterit kulturor, historik dhe fetar të xhamisë Al-Aksa.
"Veprime të tilla janë provokuese dhe të papranueshme dhe shpërfillin rolin kujdestar mbi vendet e shenjta islame në Jeruzalem. Komuniteti ndërkombëtar nuk duhet të mbetet i heshtur ndërsa armiqësia dhe agresioni po ndodhin haptas", tha ministria.
Malajzia i bëri thirrje komunitetit ndërkombëtar dhe OKB-së të marrin masa të menjëhershme dhe konkrete për të ndalur shkeljet e vazhdueshme dhe për të siguruar që Izraeli të mbajë përgjegjësi.
Duke riafirmuar solidaritetin e saj me popullin palestinez, Malajzia ripohoi mbështetjen e saj për krijimin e një shteti të pavarur palestinez, bazuar në kufijtë para vitit 1967, me Jeruzalemin Lindor si kryeqytet.
Të dielën, okupatorët izraelitë sulmuan xhaminë Al-Aksa nën mbrojtjen e policisë dhe ngritën flamuj izraelitë brenda oborrit të saj, duke kryer gjithashtu rituale provokuese.
Që nga viti 2003, policia izraelite u ka lejuar njëanshëm okupatorëve të hyjnë çdo ditë në xhami gjatë dy periudhave, namazit të mëngjesit dhe të pasdites, me përjashtim të së premtes dhe të shtunës.
Palestinezët thonë se Izraeli po intensifikon përpjekjet për të judaizuar Jeruzalemin Lindor, përfshirë xhaminë Al-Aksa, dhe për të fshirë identitetin e saj arab dhe islamik.
Palestinezët e konsiderojnë Jeruzalemin Lindor kryeqytetin e shtetit të tyre të ardhshëm, bazuar në rezolutat ndërkombëtare që nuk njohin okupimin izraelit të qytetit në vitin 1967 apo aneksimin e tij në vitin 1980.
